रमित बि.क., बाजुरा । बाजुराको बडिमालिका साँस्कृतिक कला केन्दले फागुन २३ गतेबाट आयोजना गरेको बडिमालिका बृहत साँस्कृतिक कार्यक्रममा १० लाख बराबरको आर्थिक कारोबार भएको आयोजकले बताएको छ । औपचारिक रुपमा कार्यक्रमको समापन गर्दै अध्यक्ष धिरेन बिकले सो बताएका हुन् ।
तीन दिन सम्म जारी कार्यक्रममा दुई दर्जन बढी स्थानीय तथा राष्टिय कलाकारको भब्य प्रस्तुती रहेको आयोजनले जानकारी दिएको छ । तीन दिनसम्म कलाकार दुर्गेश थापा, टंक बुढाथोकी, टंक तिमिल्सेना, अशोक दर्जी, एआर बुढाथोकी, अमृता लामिछाने, दिव्यानी बोहरा, गोपाल जिएम नेपाल, प्रकाश थापा, हर्क खडायत सहीत स्थानीय कलाकारहरुले प्रस्तुती दिएका थिए ।
बडिमालिका साँस्कृतिक कला केन्द्रको आयोजनामा सञ्चालन गरिएको कार्यक्रमको सहआयोजकको भूमिकामा ब्राण्डरुट ईन्टरटेनमेन्ट प्रालि र वन.वे फिल्म प्रा.लि रहेको थियो ।
१० लाख बराबरको आर्थिक कारोबार गर्ने भनिएकोमा लक्ष्य भेटाउन नसकिएको बताईएको छ । तेस्रो दिन टिकट मात्र चार हजार बढीको संख्यामा विक्री भएको छ । भने १० हजार बढीले अवलोकन गरेको आयोजकको दाबी छ ।

बडिमालिका साँस्कृतिक कला केन्द्रका अध्यक्ष धिरेन बिकको अध्यक्षतामा सञ्चालन भएको कार्यक्रमको प्रमुख अतिथि संविधान सभा पूर्व सभासद बसुन्धरा रोकाया रहेका थिए । गायक प्रमोद डिजीले सञ्चालन गरेको समापन कार्यक्रममा राष्टिय तथा स्थानीय कलाकारहरुलाई लक्ष्मी अल्लो भाँगो उद्योगबाट निर्माण गरिएका झोलाहरु सम्झनाको चिनोका रुपमा प्रदान गरिएको छ ।
समापन कार्यक्रममा पूर्व सभासद पेम्बागुरुग भोटे, नेकपाका नेता भरत थापा, विनोद कुमार विक, धर्मराज पाध्याय, सञ्चारकर्मी, कलाकार सहीतको भव्य उपस्थिति रहेको कार्यक्रम थियो ।

अशोक र एआरले जिते दर्शकको मन

उमेरमा कम भएपनि कलामा परिपक्क देखिएका अशोक दर्जी र एआर बुढाथोकीले दर्शकहरुलाई दमदार प्रस्तुती दिएका छन् । बडिमालिका बृहत साँस्कृतिक कार्यक्रममा देखाएको कला र प्रस्तुतीले दर्शकको मन जित्न अशोक र एआर सफल बनेका छन् । हेर्दा दाजुभाई जस्तै लाग्ने अशोक र एआर प्रस्तुती दिँदा, गाउँदा नाँच्दा उस्तै उस्तै योग्यता र परिपक्ता देखिएको थियो ।
परिचयबाट मञ्च सम्हालेका उनीहरुले आमा भन्दा राम्री कोही छैनन्, संसारमै गीतबाट प्रस्तुती सुरु गरेका थिए । घरि गाउदा, घरि नाच्दा र घरि संवाद बोल्दा दर्शकहरु मख्ख देखिन्थ्ये । मन विनाको धन ठूलोकी धन विनाको मन र आमा भन्दा राम्री कोही छैन् संसारमै बोलको गीत गाउँदा दर्शकहरु शान्त बनेका थिए ।
लाग्थ्यो दर्शकहरु गीतको संगीतमा झुमेका मात्र थिएनन्, शब्दको गहिराईमा डुबेका थिए । सानै उमेरमा देखिएको प्रतिभा र भावयुक्त गीतमा केही दर्शकहरुका आँखा नै रमाएका देखिन्थे । गीत गाउँदा बीच बीचमा टंक बुढाथोकीले पनि साथ दिएका थिए । प्रस्तुतीका लागि तीनै जना एकसाथ मञ्चमा देखिएपनि अशोक र एआरले नै दर्शकको मन जिते ।

अशोक र एआरको प्रस्तुती हेर्ने तीन दिन देखिको प्रतिक्षा पनि दर्शकले मेटाएका छन् । मनोरञ्जन र कला सँस्कृतिको प्रवद्र्धन गर्न कार्यक्रम आयोजना गरिएको हो । तीनै जनाले एकसाथ गाईरहँदा सँगै गाउन र नाच्नमा दर्शकले खुलेरै साथ दिएका थिए ।