काठमाडौं २९ साउन । धनगढी विमानस्थलको स्तरोन्नति तथा सुदूरपश्चिमको हवाई कनेक्टिभिटी सुदृढीकरण सम्बन्धी सुदूरपश्चिमका सांसद, निजी क्षेत्र र सरोकारवालाबिच अन्तरक्रिया भएको छ ।
विहीवार राष्ट्रिय योजना आयोगको सभाहल, सिंहदरबारमा आयोजना गरिएको अन्तरक्रियामा संस्कृति, पर्यटन तथा नागरिक उड्डयन मन्त्री खडक राज पौड्याल, राष्ट्रिय योजना आयोगका उपाध्यक्ष डा. गुणाकर भट्ट, सार्वजनिक लेखा समितिका सभापति,भरत खड्का, प्रतिनिधिसभा सदस्य डा. आनन्दबहादुर चन्द, गणेशसिंह ठगुन्ना, ऐन बहादुर महर, जगत जोशी, यज्ञबहादुर बोगटी,भरत कुमार स्वार, पर्यटन व्यवसायी मायाप्रकाश भट्ट लगायत नजी क्षेत्रका प्रतिनिधिहरूको उपस्थिति रहेको थियो ।
कार्यक्रममा धनगढी विमानस्थलको वर्तमान अवस्था, आवश्यक पूर्वाधार विकास, क्षमता विस्तार, हवाई सेवा तथा कनेक्टिभिटीको सुधारलगायत विषयमा गहन छलफल भएको कार्यक्रममा सहभागी मायाप्रकाश भट्टले बताउनुभयो । सहभागीहरूले धनगढी विमानस्थललाई आधुनिक, सुरक्षित र दीर्घकालीन रूपमा विस्तार गर्दै सुदूरपश्चिमको पर्यटन, व्यापार, लगानी तथा आर्थिक विकासको प्रमुख प्रवेशद्वारका रूपमा विकास गर्नुपर्नेमा जोड दिएको उहाँले जानकारी दिनुभयो ।
नाट्टा सुदूरपश्चिमका तर्फबाट धनगढी विमानस्थलको स्तरोन्नतिलाई सुदूरपश्चिमको समग्र पर्यटन विकाससँग जोड्दै स्पष्ट योजना, पर्याप्त बजेट र समयबद्ध कार्यान्वयनका लागि सम्बन्धित निकायको ध्यानाकर्षण गराइएको नाट्टाका प्रतिनिधि पदमविक्रम सिंहले बताउनुभयो ।
उहाँले, धनगढी विमानस्थलको स्तरोन्नति केवल विमानस्थलको विकास मात्र नभई सुदूरपश्चिमको पर्यटन, व्यापार, रोजगारी र समृद्धिको आधार निर्माण गर्ने राष्ट्रिय महत्वको विषय भएको बताउनुभयो  ।  कार्यक्रममा सहभागी व्यक्तित्वलाई सुदूरपश्चिमको सामाजिक तथा विकास क्षेत्रमा लामो समयदेखि योगदान पु¥याउँदै आउनुभएका वरिष्ठ समाजसेवी मायाप्रकाश भट्टले स्वागत गर्नु भएको थियो ।
कार्यक्रममा राष्ट्रिय योजना आयोगका सदस्य,संस्कृति, पर्यटन तथा नागरिक उड्डयन मन्त्रालयका सचिव, नेपाल नागरिक उड्डयन प्राधिकरणका महानिर्देशक मुकेश डंगोल, नेपाल नागरिक उड्डयन प्राधिकरणका राजेन्द्र नायक, बुद्ध एयरका सुवर्ण खरेल, कञ्चनपुरका पर्यटन व्यवसायी परमानन्द भण्डारी,पदम सिंह, नरेन्द्र भट्ट, सञ्चारकर्मी सुरज कुँवर, अमर शाही लगायतको उपस्थिति रहेको थियो ।