काठमाडौं ८ भाद्र । कागेश्वरी नगरपालिका कार्य सम्पादनमा काठमाडौं जिल्लाकै उत्कृष्ट स्थानीय तह घोषित भएको छ । संघीय मामिला तथा सामान्य प्रशासन मन्त्रालयले आर्थिक वर्ष २०८०–८१ को स्थानीय तह संस्थागत क्षमता स्वमूल्याङ्कनको सार्वजनिक गरेको नतिजाअनुसार कागेश्वरीले हालसम्मकै सबैभन्दा सर्वोत्कृष्ट अंक ८३.७५ अंक साथ जिल्लाकै उत्कृष्ट स्थानीय तह बन्न सफल भएको हो ।

ईश्वर कार्कीको नेतृत्वमा रहेको कागेश्वरी नगरपालिकाले यस अघि आव २०७६–७७ मा ६८, ०७७–७८ मा ७१.५, ०७८–७९ मा ६१.५, ०७९–८० मा ६७.२५ प्राप्त गरेको थियो । यो पटक कागेश्वरी मनोहराले काठमाडौं महानगरलाई समेत उछिनेको छ । यसपटक काठमाडौंको ८१.७५ अंक रहँदा कागेश्वरीको ८३.७५ अंक रहेको छ । जुन अंक काठमाडौं जिल्लाकै स्थानीय तहमध्ये सबैभन्दा धेरै अंक हो ।

मेयर कार्कीको नेतृत्वमा कागेश्वरीले पछिल्ला दिनमा एकपछि अर्को उत्कृष्ट कार्य गर्दै आइरहेको स्थानीयहरु जनाउँछन् । असल जनप्रतिनिधिले जनताको मतको कदर गर्दै निष्पक्ष र दूरदर्शिताकासाथ काम गरेमा सफलता प्राप्त गर्न सकिन्छ भन्ने कुरा मन्त्रालयले सार्वजनिक गरेको नतिजाबाट स्पष्ट भएको छ ।

मन्त्रालयले गुणस्तर परिक्षण पश्चात् सार्वजनीक गरेको सुचना अनुसार काठमाडौँ जिल्लाका स्थानीय तहमा कागेश्वरी मनोहरा नगरपालिकाले हाल सम्मकै सर्वोउत्कृष्ट अंक प्राप्त गर्न सफल भएको छ । नगरपालिकाले यो वर्ष ८३.७५ अंक प्राप्त गर्न सफल भएको हो ।

नगरपालिकाको प्रारम्भिक नतिजा ८६.५ भएता पनि गुणस्तर परिक्षण पश्चात् ८३.७५ कायम भएको हो ।

यो उपलब्धिले स्थानीय तहमा सेवा प्रवाह, संस्थागत विकास, पारदर्शिता, र सुशासनतर्फ नगरपालिकाको प्रतिबद्धता झल्काउँछ। नेपाली कांग्रेसबाट निर्वाचित नगर प्रमुख कार्की नेपाल नगरपालिका संघ बागमती प्रदेशको संयोजक समेत छन् ।

त्यस्तै, कीर्तीपुर नगरपालिकाले ७५.२५ अंक, गोर्कणेश्वर नगरपालिकाले ६८.५० अंक, चन्द्रागिरी नगरपालिकाले ८०.५० अंक, दक्षिणकाली नगरपालिकाले ६३ र शंखरापुर नगरपालिकाले ८१.७५ अंक प्राप्त गरेको छ । यी नगरपालिका भन्दा कागेश्वरीले अग्रस्थान हासिल गर्न सफल भएको हो ।