धनगढी । प्रकारका जातीय छुवाछुत तथा भेदभाव विरुद्ध प्रतिरोध गरौँ,सामाजिक न्याय सहितको समृद्ध र समावेशी नेपाल निर्माण गरौँ भन्ने मूल नाराका साथ ५४ औँ अन्तराष्टिय रंगभेद तथा जातीय भेदभाव विरुद्धको दिवसको सन्दर्भमा जातीय विभेदको वर्तमान अवस्था,सबैधानिक तथा कानुनी प्रावधान र कार्यान्वयनमा चुनौती विषयक अन्र्तक्रिया कार्यक्रम धनगढीमा सम्पन्न भएको छ ।

जिल्ला प्रशासन कार्यालय,कैलालीको आयोजना र जिल्ला स्थित दलितअधिकारको क्षेत्रमा क्रियाशिल संघसस्थाहरुको सहकार्यमा आयोजित उक्त कार्यक्रमका प्रमुख अतिथी नेकपाका नेता एवं संघीय सांसद लेखराज भट्टले उद्धघाटन गर्नुभएको थियो । कार्यक्रममा नेता भट्टले नेपाली लोकतान्त्रिक आन्दोलनको मूल्य र मान्यताद्वारा निर्दिष्ट सिद्धान्त अनुसार मुलुकमा सदियौंदेखि विद्यमान जातीय, भाषिक, सांस्कृतिक, सामाजिक, क्षेत्रीय, लैङ्गीक, वर्गीय विभेदको अन्त्य नहुुनु सबैका लागि लज्जास्पद र चुनौतीको विषय भएको बताउनु भयो । उहाँले विभेदकारी सोच र सामाजिक संरचना रहे सम्म संघीय लोकतान्त्रिक गणतन्त्र पनि सस्थागत हुन नसक्ने भएकाले दलित समुदायको मानवअधिकार, सामाजिक न्याय,सुरक्षा,समृद्ध, र समावेशी नेपाल निर्माण का लागि संवैधानिक तथा कानुनी रुपमै दलित समुदायलाई विशेषअधिकार दिनुपर्ने बताउनु भयो ।

कार्यक्रमका विशष्टि अतिथी पूर्व सासद हरि श्रीपाईलीले विगत ७० वर्षको दलित आन्दोलनले दर्जनौं चुनौतिका बावजूद केही उपलब्धी हासिल गरेता पनि जातीय छुवाछुत विभेदका कारण दलित समुदायले अहिले पनि विभिन्न उत्पीडन र यातना सहनु परेको बताए । उनले सामाजिक असुरक्षाका कारण कैयौँ दलितहरु विस्थापित हुनुपर्ने वाध्यता रहेको बताए । उनले दलित समुदायको मानवअधिकार, सामाजिक न्याय, सुरक्षा, समृद्ध र समावेशी नेपाल निर्माणमा राज्य गम्भीर बन्नुपर्ने बताए ।

कार्यक्रममा प्रदेश सासद अर्चना गहतराज,नेपाल दलित संघका केन्दीय उपाध्यक्ष छत्र वहादुर टेलर,एडजस नेपालकी अध्यक्ष चित्रा पनेरु,अधिवक्ता जानकी तुलाधर,दलित साहित्य सोपानका अध्यक्ष गणेश नेपाली,पत्रकार मिलन परियार लगायतकाले जातीय विभेद अन्त्य र दलितअधिकारका लागि संवैधानिक तथा कानुनी प्रावधानहरु प्रभावकारी कर्यान्वयनमा जोड दिएका थिए ।
कार्यक्रम नेपाल राष्टिय दलित समाज कल्याण संघका अध्यक्ष चक्र विकको अध्यक्षतामा सम्पन्न भएको थियो ।