धनगढी । फागु पर्वको अवसरमा धनगढीको चटकपुरमा रहेको डल्लुज फुटसलले फुटसल प्रतियोगिता आयोजना गरेको छ । चैत १ गतेदेखि नयाँ व्यवस्थापन सहित सुरु भएको डल्लुज फुटसलले फुटसल प्रतियोगिता आयोजना गरेको हो ।

दुई दिनसम्म सञ्चालन हुने प्रतियोगिताको वडा नम्बर ४ का वडाध्यक्ष दिपक थापाले मंगलबार उद्घाटन गरे । रिवन काट्नुका साथै रेफ्रीलाई बल हस्तान्तरण गरेर फुटसल प्रतियोगिताको उद्घाटन समारोहमा बोल्दै वडाध्यक्षद थापाले फुटसलको बढ्दो आकर्षणले यस्ता प्रतियोगिताहरु आयोजना हुनुपर्नेमा जोड दिए । उनले खेलकुदका अन्य प्रतियोगिता र फुटसल प्रतियोगिता मार्फत स्वस्थ हुनुका साथै युवाहरुलाई लगत दिशामा लाग्नबाट बचाउनका लागि फुटसल राम्रो माध्यम भएको बताए ।

बुधबारसम्म आयोजना हुने फुटसल प्रतियोगितामा विभिन्न क्षेत्रका १३ वटा टीमहरुको सहभागीता रहेको छ । आज पहिलो दिन लिग चरणका विभिन्न खेलहरु सम्पन्न भएका छन् । आज भएका खेलहरुमा रम्बादेवी ट्रान्सपोर्टलाई ईन्जिनियरिङ समुहले पराजित गरेको छ । एमआरको टीमले बोराडाँडी बी लाई हराउँदा मोती चोकको टीमले शक्ती युवा क्लबलाई किनारा लगायो । त्यसैगरी आयोजक डल्लुज फुटसललाई बैकर्स क्लबको टीमले पराजित गरेको छ ।

प्रतियोगिताको सेमिफाईनल र फाईनल खेलहरु भोली आयोजना हुने आयोजक डल्लुज फुटसलका सञ्चालक अभेष चन्दले जानकारी दिए । यसअघि नै सञ्चालनमा रहेको फुटसल नयाँ व्यवस्थापन सहित सुरु भएसँगै फुटसल प्रतियोगिता आयोजना गरिएकोमा आगामी दिनमा थप प्रतियोगिताहरु आयोजना गर्ने डल्लुज फुटसलले जनाएको छ । फुटसल सहित अन्य सेवा सुविधा सहित फुटसल क्षेत्रलाई सञ्चालन गर्ने लक्ष्य राखिएको डल्लुज फुटसलको सञ्चालक समितीका अध्यक्ष उमेश विक्रम शाहले बताए ।