धनगढी २३ माघ । गोदावरीको हरैयाबाट धनगढी उपमहानगरपालिका १७ धुरझन्ना सारिएका सुकुम्वासीहरुलाई मंगलबार कम्वल वितरण गरिएको छ ।

धनगढी उप–महानगरपालिकाका प्रमुख नृपबहादुर वड र कैलालीका प्रमुख जिल्ला अधिकारी बाबुराम श्रेष्ठले संयुक्त रुपमा सुकुम्बासी परिवारलाई कम्वल वितरण गरेका हुन ।

नगरप्रमुख वडले सितलहरबाट बचाउनका लागि सुकुम्बासी परिवारमा कम्वल वितरण गरिएको बताए । लामो समय देखि हरैयामा बस्दै आएका सुकुम्वासीहरुलाई कस्ले कुन स्वार्थले सा¥यो थाहा छैन नगरप्रमुख वडले भने, आफ्नो नगर क्षेत्रमा सारिएकाले मानवियताका रुपमा हामी सहयोग गर्दै आएका छौं ।
कैलालीका प्रमुख जिल्ला अधिकारी बाबुराम श्रेष्ठका अनुसार सबै घर परिवारलाई दुई वटा कम्वल पुग्ने गरि १ सय २८ थान कम्वल वितरण गरिएको छ । केहि दिन भित्रै एक एक वटा डसना वितरण गर्ने गरि उप–महानगरपालिका संग समन्वय भैरहेको छ ।
लामो समयदेखि हरैयामा बस्दै आएका सुकुम्बासी परिवारलाई गत आसर १६ गते धुरझुन्ना पु¥याइएको हो ।

सुकुम्वासी परिवारहरु बस्ती स्थान्तरण गर्दा वितरण गरिएका पालभित्र रात काटिरहेका छन् । चिसोका कारण बालबालिकाहरुमा रुघा खोकि र निमोनिया समेत देखिएको छ ।

‘हरैयामा रहँदा मजदुरी गरेर छाक टारिन्थ्यो’ सुकुम्बासीहरुकी अगुवा हिरा वादीले भनिन–‘दुर्गममा ल्याएर राखियो काम गरेर खाउँ भन्दा पनि काम पाइदैन ।’ दशै तिहार धनगढी उप–महानगरपालिकाले वितरण गरेको दाल चामल खाएर मनाएको पनि बादीले बताईन ।
सौभाग्य रियल स्टेट एण्ड हाउजिङ प्रालिले गत माघ २५ गते सुकुम्बासी बसेको हरैया स्थित २१ बिगहा जग्गा खरिद गरेको थियो । जग्गा बिक्रीमा तत्कालिन माओवादीका केहि नेताको संलग्नता रहेको आरोप लगाइएको छ ।
मुलुकमा द्वन्द्व उत्सर्गमा पुगेको समय २०६१ सालमा तत्कालिन विद्रोही माओवादीले नै उक्त जग्गामा सुकुम्बासीलाई बसाएको थियो । उनीहरु कैलाली सहित पहाडी विभिन्न जिल्लाका छन् ।