पोखरा, २ भदौ । गण्डकी प्रदेशमा बिरामी तथा नवजात शिशुको हेरचाहमा परिवारका सदस्यहरूलाई सक्षम र आत्मनिर्भर बनाउने उद्देश्यका साथ ‘परिवार स्वास्थ्य हेरचाह कार्यक्रम’ को औपचारिक प्रारम्भ भएको छ। गण्डकी प्रदेश स्वास्थ्य मन्त्रालयसँगको साझेदारी, नोरा हेल्थको आर्थिक सहयोग र बहुउद्देश्यीय विकास समाज (MPDS) को नेतृत्व तथा कार्यान्वयनमा सञ्चालन हुने यस कार्यक्रमको प्रारम्भिक बैठक मंगलबार पोखरामा सम्पन्न भएको हो।

गण्डकी प्रदेशका स्वास्थ्य मन्त्री लक्ष्मण बहादुर पाण्डेको प्रमुख आतिथ्य र स्वास्थ्य मन्त्रालयका प्रदेश सचिव डा. युवानिधि बसौलाको अध्यक्षतामा आयोजना गरिएको उक्त बैठकमा प्रदेशका १४ प्रादेशिक अस्पतालका मेडिकल सुपरिटेन्डेन्ट तथा मेट्रोन र स्थानीय तहअन्तर्गतका २ अस्पतालका प्रतिनिधिहरूको सहभागिता रहेको थियो।

अस्पतालमा बिरामी वा सुत्केरीको कुरुवा बस्ने परिवारका सदस्यहरूलाई केवल सहयोगी मात्र नबनाई स्वास्थ्य हेरचाहका सक्षम साझेदारका रूपमा विकास गर्ने यस कार्यक्रमको मुख्य उद्देश्य रहेको छ। कार्यक्रमअन्तर्गत स्वास्थ्यकर्मीहरूमार्फत परिवारका सदस्यहरूलाई औषधि-उपचार, पोषण, सरसफाइ, संक्रमण रोकथाम र मानसिक सहयोगजस्ता आधारभूत हेरचाहसम्बन्धी व्यावहारिक ज्ञान दिइनेछ। विशेष गरी मातृ तथा शिशु स्वास्थ्य, क्षयरोग र नसर्ने रोग लगायतका क्षेत्रमा पारिवारिक सहभागितालाई प्राथमिकता दिइनेछ।

डिस्चार्जपछि घरमा हेरचाहको अभावले गर्दा बिरामी पुनः अस्पताल आउनुपर्ने बाध्यतालाई कम गर्न प्रत्यक्ष शिक्षा तथा डिजिटल माध्यम (सूचना र फलोअप) बाट निरन्तर सम्पर्कमा रहने व्यवस्था मिलाइनेछ।

कार्यक्रमलाई सम्बोधन गर्दै स्वास्थ्य मन्त्री लक्ष्मण बहादुर पाण्डेले स्वास्थ्य सेवालाई जनमुखी, गुणस्तरीय र परिवारमैत्री बनाउन यो कार्यक्रम महत्त्वपूर्ण हुने र यसले उपचारको प्रभावकारिता बढाउने बताउनुभयो। साथै, उहाँले यस कार्यक्रमलाई प्रदेशको स्वास्थ्य प्रणालीसँग जोडेर संस्थागत रूपमा अघि बढाउन मन्त्रालयले पूर्ण सहयोग र सहजीकरण गर्ने प्रतिबद्धता जनाउनुभयो।

अस्पतालको उपचारसँगै घरको हेरचाह पनि उत्तिकै महत्त्वपूर्ण हुने उल्लेख गर्दै प्रदेश स्वास्थ्य सचिव डा. युवानिधि बसौलाले कार्यक्रमका लागि प्राविधिक तथा आर्थिक सहयोग निरन्तर रहने बताउनुभयो। त्यसैगरी एमपीडीएसका कार्यकारी निर्देशक प्रेमबहादुर माहरले प्रदेश सरकार र मन्त्रालयसँग समन्वय गरी स्वास्थ्य संस्थाको क्षमता अभिवृद्धि र कार्यक्रमको दिगोपनामा सक्रिय भूमिका निर्वाह गर्ने प्रतिबद्धता व्यक्त गर्नुभयो।

आगामी चरणमा सहभागी अस्पतालहरूबाट स्वास्थ्यकर्मीहरूको छनोट, क्षमता अभिवृद्धि, परिवार तथा कुरुवा शिक्षा, र डिजिटल नामांकन एवम् अनुगमन प्रक्रियालाई क्रमशः अगाडि बढाइनेछ। यस कार्यक्रमले “अस्पतालमा उपचार, घरमा निरन्तर हेरचाह” भन्ने अवधारणालाई व्यवहारमा उतार्ने अपेक्षा राखिएको छ।