धनगढी, २९ साउन । पश्चिम नेपालको कैलाली र कञ्चनपुर जिल्लामा मात्र बसोबास रहेको रानाथारुले अरु समुदाय भन्दा फरक समयमा मनाउदै आएको तीजमा पहिलो पटक स्थानीय विदा पाएका छन् ।

हरेक वर्ष आजैका दिन रानाथारु धुम धामका साथ तीज पर्व मनाई रहेका छन् । उनीहरुको यो पर्वमा सरकारले आज स्थानीय बिदा घोषणा गरेको छ । तीज पर्व रानाथारु समुदायको दोस्रो ठूलो पर्व हो ।

धनगढी उप–महानगरपालिका–१३ कैलाली गाउँका स्थानीय मेखराज रानाले राना समुदायका चेलीले दाजुभाई र भतिजाहरूको सु–स्वास्थ्य र दीर्घायूको कामना गरी आजको दिन निराहार ब्रत बसेर पर्व मनाउने गरेको बताएका छन् ।

उता, कञ्चनपुर जिल्लाको लालझाँडी गाउँपालिकाले पनि आज एक दिन स्थानीय बिदा उपलब्ध गराएको छ । रानाथारुको पर्वमा स्थानीय बिदाको घोषणा भएको सम्भवतः पहिलो बिदा रहेको रानाथारु अगुवाहरू बताउँछन् ।

राना थारु समुदायलाई आदीवाशी जनजातीमा सुचिकृत गर्न पटक पटक आन्दोलन गरेपनि अहिलेसम्म उनीहरु आदीवाशी जनजातीमा सुचिकृत हुन सकेका छैनन । राजनितिक दलहरुले चुनावी एजेण्डा बनाएपनि चुनाव पछि उनीहरुको माग प्रति कुनै दलले पनि चाँसो देखाएको पाईदैन ।