धनगढीः प्राज्ञिक विद्यार्थी परिषद् नेपालको नवौँ राष्ट्रिय अधिवेशन चैत्रमा हुने भएको छ। ‘आत्मनिर्भर अर्थतन्त्र र भ्रष्टाचार नियन्त्रणका लागि नवौँ राष्ट्रिय अधिवेशन’ भन्ने मुल नारासहित धनगढीमा चैत्र १८, १९ र २० गते हुने भएको हो।

आज धनगढीमा प्राज्ञिक विद्यार्थी परिषदले पत्रकार सम्मेलनको आयोजना गरी अधिवेशन आयोजनाको विषयमा जानकारी गराएको छ। अधिवेशनको नारा र लोगो पनि सार्वजनिक गरिएको छ। परिषद्का महासचिव छितराज न्यौपानेले धनगढीमा आयोजना हुन गइरहेको अधिवेशनमा देशभरका १२ सय भन्दा बढी प्रतिनिधिहरूको उपस्थिीती हुने बताएका हुन्।

अधिवेशनको पहिलो सत्रमा राष्ट्रिय पृथ्वी युवा प्रेरणा पुरस्कारद्वारा समाजमा प्रेरणादायी कार्य गर्ने युवालाई पुरस्कृत गरिनेछ। अधिवेशनमा राष्ट्रिय सुरक्षा, आत्मनिर्भर अर्थतन्त्र, पर्यटन, कृषि, उद्यमशीलता, शिक्षा, सेवालगायत विषयमा समानान्तर सत्र सञ्चालन हुने परिषद्का महासचिव न्यौपानेले बताएका छन्।

विभिन्न विषयमा भाषण सत्र रहनेछन् भने शिक्षा, आर्थिक तथा समसामयिक विषयमा महत्वपूर्ण प्रस्ताव समेत पारित गरिनेछ। अधिवेशनमा राष्ट्रिय अध्यक्ष एवं राष्ट्रिय महासचिवको निर्वाचन सहित केन्द्रीय कार्यकारिणी समितिको घोषणा समेत हुनेछ । दिनेश खबरबाट