धनगढी ३० भाद्र । प्रदेश सरकारका मुख्यमन्त्री त्रिलोचन भट्टले राजघाट–मोहना नदीमा निर्माणाधिन पुलको निर्माण कार्यलाई गतिदिन निर्माण कम्पनीलाई निर्देशन दिएका छन् । धनगढी उपमहानगरपालिका ३ चटकपुरस्थित राजघाट मोहना नदीमा निर्माणाधिन रैकवार बिचवा जोड्ने पुलको निरीक्षण गरी मुख्यमन्त्री भट्टले ठेकेदार चन्द्रशेखर मल्ललाई कडा निर्देशन गरेका हुन ।

मुख्यमन्त्री भट्टको भनाईमा बाजेको पालादेखी सुरु गरिएको योजना नातीका पालामा पनि सम्पन्न नहुने परम्पराको अब यो प्रदेशमा अन्त्य गरिने छ । ‘जनतालाई सेवा दिने काममा कसैले बहाना गर्नु हुदैन भन्दै केन्द्र सरकारको योजना भएपनि योजना अनुसारको रकम ल्याउन प्रदेश सरकारले पहल गर्ने मुख्यमन्त्रीले भने । प्राविधिक कर्मचारीले प्राविधिक सहयोग गर्ने र ठेकेदार कम्पनीले समयमै निर्माण कार्य पूरा गर्नुपर्ने उनले बताए ।

मुख्यमन्त्री भट्टले डिभिजन सडक कार्यालय कंचनपुरका इन्जिनियर महेन्द्रराज पन्तलाई सो पुलको निर्माण कार्य चाडो सम्पन्न गर्नका लागि आवश्यक सहयोग गर्न पनि निर्देशन दिए ।

२०७१ असार ३१ गते सम्झौता भई ३ वर्षमा सक्ने गरी करिब १० करोडको लागतमा सो पुलको निर्माण सुरु गरिएको थियो । पटकपटक म्याद थप गरिए पनि ठेकेदारको लापरवाहीका कारण निर्माण ठप्प भएको र जनताले बर्सेनि सास्ती खेप्नु परेको स्थानीयले गुनासो गरेपछि मूख्यमन्त्री भट्ट र भौतिक पूर्वाधार विकास मन्त्री पठान सिंह बोहराले स्थलगत निरीक्षण गरी स्थानीय बासिन्दा र जनप्रतिनिधिसंग छलफल गरेका थिए ।

लाईट एड्भेन्चर कम्पनीद्वारा निर्माण कार्य सुरु गरिएको उक्त निर्माणाधिन पुल सम्झौता अवधि सकिएको दुई वर्ष बितिसक्दा पनि अझै निर्माण कार्य पूरा हुन सकेको छैन् । २०७५ जेठ १५ गते सक्ने गरी प्रथम पटक सम्झौता भएपनि सो अवधिमा निर्माण कार्य सम्पन्न नभएपछि दोस्रो पटक म्याद थपका लागि निर्माण कम्पनीले निवेदन दिएको डिभिजन सडक कार्यालय कंचनपुरका इञ्जिनीयर पन्तले जानकारी दिए । उनका अनुसार निर्माण कम्पनी सम्बद्ध ठेकेदारले आगामी २०७६ असार ३० गते निर्माण सक्ने गरी म्याद थपको निवेदन दिए अनुसार म्याद थपको फाइल अगाडि बढाइएको छ ।

करिब १० करोडको लागतमा निर्माण गर्नका लागि डिभिजन सडक कार्यालय महेन्द्रनगरले गरेको टेन्डरमा लाईट एड्भेन्चर कम्पनीले साढे सात करोडको कबुल ठेक्का पाएको थियो ।