खेम राज खनाल, काठमाण्डौ ५ असार । महोत्तरीको बर्दिबास नगरपालिकाले २० वर्ष उमेर पूरा गरी विवाह गर्ने छोरीलाई ५१ हजार रुपैयाँ नगद प्रोत्साहन दिने घोषणा गरेको छ ।

नगरको १८औँ नगरसभामा प्रस्तुत आर्थिक वर्ष २०८३/८४ को नीति तथा कार्यक्रम तथा बजेट वक्तव्यमा यो व्यवस्था समावेश गरिएको हो । नगरपालिकाका मेयर प्रल्हादकुमार क्षेत्रीका अनुसार बालविवाह न्यूनीकरण गर्ने उद्देश्यले यो प्रोत्साहन कार्यक्रम ल्याइएको हो ।

यसले कानुनी उमेरपछि मात्र विवाह गर्नुपर्ने सचेतना अभिवृद्धि गर्ने अपेक्षा नगरपालिकाले गरेको छ । यसअघि २०८० साल चैत ५ गते नगरले मुसहर समुदायलाई लक्षित गर्दै उमेर पुगेर विवाह गर्ने मुसहर जोडीलाई ५० हजार रुपैयाँ प्रोत्साहन दिने घोषणा गरेको थियो । नगर कार्यपालिकाको अभिलेखअनुसार हालसम्म बर्दिबास–१२ का एक जोडीले मात्र यो रकम प्राप्त गरेका छन् ।

नगरपालिकामा १४ वडा रहेका छन्, जसमध्ये अधिकांश वडामा मुसहर समुदायको बसोबास छ । तर प्रोत्साहन कार्यक्रम अन्तर्गत हालसम्म न्यून मात्र सहभागिता देखिनुका कारण बालविवाह अझै पूर्ण रूपमा अन्त्य नभएको सङ्केत मिल्ने सामाजिक–राजनीतिक कार्यकर्ता देवनारायण महतोले बताउनुभयो ।

झण्डै एक लाख जनसङ्ख्या रहेको बर्दिबास नगरपालिकामा हालसम्म १३ वटा वडा बालविवाहमुक्त घोषणा भइसकेका छन् भने बर्दिबास–१२ मात्र बाँकी छ । नगरले ल्याएको नयाँ व्यवस्थाअनुसार २० वर्ष उमेर पूरा गरी विवाह गर्ने छोरीलाई प्रोत्साहन रकम दिने कार्यक्रमले सामाजिक सचेतना बढाउन सहयोग पुग्ने अपेक्षा गरिएको छ ।

साथै मुसहर समुदायका लागि भने यसअघि जस्तै पुरुष र महिलालाई छुट्टै प्रोत्साहन दिने व्यवस्था यथावत् राखिएको मेयर क्षेत्रीले स्पष्ट पार्नुभयो । नगरपालिकाको यो निर्णयलाई महिला अधिकारकर्मीहरूले सामाजिक सुधारतर्फको सकारात्मक कदमका रूपमा स्वागत गरेका छन् ।