धनबहादुर बिक, पुनर्वास १३ असोज । समुदायमा डेंगु, मलेरिया तथा जापानिज इन्सेफलाइटिसजस्ता किटजन्य रोगको जोखिम न्यूनीकरण गर्ने उद्देश्यले स्थानीयस्तरमा जनचेतनामूलक कार्यक्रम सञ्चालन गरिएको छ।
मंगलबार पुनर्वास नगरपालिका ६ स्थित प्रतिभानगर बजारका होटल , खाजा पसल मा थुपारिएर राखिएका सरसामान को अवलोकन गरि प्रभातफेरि सहित उक्त कार्यक्रम को आयोजना गरिएको थियो ।

कार्यक्रममा स्वास्थ्यकर्मी तथा स्वयंसेवकहरूले लामखुट्टेको टोकाइबाट सर्न सक्ने रोगहरूबाट बच्ने उपायबारे स्थानीयवासीलाई जानकारी दिएका थिए। सहभागीहरूलाई घर वरपर पानी जम्न नदिने, पानीका भाँडाहरू छोपेर राख्ने, फोहोर तथा झाडी सफा गर्ने र लामखुट्टेको टोकाइबाट बच्न झुल तथा आवश्यक सुरक्षा उपाय प्रयोग गर्न आग्रह गरिएको थियो।

कार्यक्रममा विशेषगरी डेंगुका लागि एडिस लामखुट्टेको प्रजननस्थल नष्ट गर्ने, मलेरिया रोकथामका लागि लामखुट्टेको टोकाइबाट जोगिने तथा जापानिज इन्सेफलाइटिसबाट बच्न सरसफाइ, लामखुट्टे नियन्त्रण र उपलब्ध खोपसम्बन्धी जानकारी दिइएको थियो।

स्वास्थ्यकर्मीहरूले लामखुट्टेको संख्या नियन्त्रण गर्न समुदायको सामूहिक सहभागिता आवश्यक रहेको बताए। उनीहरूले ज्वरो आउने, टाउको दुख्ने, शरीर दुख्ने वा अन्य असामान्य लक्षण देखिएमा स्वास्थ्य संस्थामा गई समयमै जाँच तथा उपचार गराउन पनि आग्रह गरे।
पुनर्वास नगरपालिका स्वास्थ शाखा ले आयोजना गरेको उक्त कार्यक्रमको सहजीकरण वडा नम्बर ६ सहरि स्वास्थ्य क्लिनिक प्रमुख चक्र बिष्टले गरेका थिए भने उल्लेखित रोगहरू तथा सो बाट बच्नका निमित्त जनचेतना सम्बन्धि जानकारी पुनर्वास नगरपालिका स्वास्थ शाखा प्रमुख राम धामीले गरेका थिए ।

कार्यक्रममा स्थानीय जनप्रतिनिधि, स्वास्थ्यकर्मी, महिला स्वास्थ्य स्वयंसेविका, शिक्षक, विद्यार्थी , जनपद प्रहरी , सशस्त्र प्रहरी तथा स्थानीय बासिन्दाको सहभागिता रहेको थियो। सहभागीहरूले आफ्नो घर, टोल तथा समुदायमा लामखुट्टेको प्रजननस्थल खोजी गरी नष्ट गर्ने र सरसफाइलाई नियमित बनाउने प्रतिबद्धता जनाएका छन्।

स्वास्थ्यकर्मीका अनुसार किटजन्य रोग नियन्त्रण सरकार वा स्वास्थ्य संस्थाको मात्र जिम्मेवारी नभई प्रत्येक घरपरिवार र समुदायको साझा जिम्मेवारी हो। समुदायस्तरमा निरन्तर जनचेतना, सरसफाइ र रोगको समयमै पहिचान तथा उपचारबाट किटजन्य रोगको जोखिम कम गर्न सकिने बताइएको छ।