धनगढी, ३ माघ । धनगढी उपमहानगरपालिकाका प्रमुख नृपबहादुर वडले ग्रेडिङ्ग मुल्यांकन पद्धतीका बारेमा अन्यौलता रहेको बताएका छन् ।

बिहीबार राष्ट्रिय परीक्षा बोर्ड योजना अनुगमन तथा मुल्यांकन महाशाखा सानोठिमीले धनगढीमा आयोजना गरेको एक बिषय लेटर ग्रेडिङ्ग सम्वन्धी अभिमूखीकरण कार्यक्रमको उद्घाटन सत्रमा बोल्दै नगरप्रमुख वडले यस्तो धारणा राखेका हुन । उनले ग्रेडिङ्ग पद्धतीका बारेमा विद्यार्थी मात्रै नभएर अभिभावक समेतमा अन्यौलता रहेको बताए ।

यस बारेमा स्वयं परीक्षा दिने विद्यार्थीले बुझ्न पाउनुपर्छ नगरप्रमुख वडले भने,यस्तै अभिमूखीकरण कार्यक्रमले बुझाउन सक्छ । यो पद्धतीको बारेमा ब्यापक छलफल चलाएर मात्रै कार्यान्वयनमा ल्याएको भए अहिले अन्यौलता आउने थिएन नगरप्रमुख वडले भने,अझैपनि छलफलको दायरालाई ब्यापक बनाउन अनुरोध गर्दछु ।

नगरप्रमुख वडले अहिले सरकारले दिईरहेको शिक्षा नितिले शैक्षिक बेरोजगारी मात्रै बढाएको बताए । आधा उमेर र पैशा पढाईमा नै खर्च गर्नुपर्ने र त्यसपछि पनि रोजगारी नपाउने शिक्षाले गरिवी बढाएको छ नगरप्रमुख वडले भने,अहिले चाहिएको ब्यावहारीक र गरिखाने शिक्षा हो ।

नगरप्रमुख वडले प्राविधीक बिषयको पढाई सुरु गर्न विद्यालयहरु संग आग्रह गरे । धनगढी नगर क्षेत्रका विद्यालयहरुलाई प्राविधीक शिक्षातर्फ अग्रसर गराउने निति आफुहरुले लिएको नगरप्रमुख वडले बताए । कार्यक्रममा जिल्ला शिक्षा अधिकारीहरु, राष्ट्रिय परीक्षा बोर्ड प्रदेश परीक्षा ब्यबस्थापन कार्यालयका प्रतिनिधीहरु, विद्यालय ब्यबस्थापन समितिका अध्यक्षहरु लगायतको सहभागिता रहेको छ ।