रमित बि.क.माघ २ बाजुरा । जिल्ला सदरमुकाम मार्तडीका विभिन्न होटल व्यवसायी र स्थानीयहरुको घरबाट बरामद गरेको अवैध घरेलु मदिरा बरामद गरी आज प्रहरीले नष्ट गरेको छ ।

अवैध रुपमा बनाउने गरेको घरेलु मदिरा जिल्लामा व्याप्त रहेपछि प्रहरीको सक्रियतामा अवैध मदिरा बरामद गरी नष्ट गरेको जिल्ला प्रहरी कार्यालय बाजुराका प्रहरी नायव उपरिक्षक उद्धवसिंह भाटले बताउनुभएको छ ।

उहाँले सदरमुकाम बजारमा ल्याउदै गरेको अवस्थामा र कतिपय होटलहरुमा घरेलु मदिरा बनाउनका लागि बनाइएको कच्चा पदार्थ गरी दुई सय ५५ लिटर मदिरा बरामद गरिएको हो । प्रहरीले बरामद गरेको अवैध घरेलु मदिरा जिल्लाका राजनितिक दलका प्रतिनिधी जनप्रतिनिधी र पत्रकारको रोहवरमा घरेलु मदिरा नष्ट गरिएको प्रमुख भाटले बताए ।
उहाँका अनुसार एक महिनाको अवधीमा धुलाचौर अस्थायी प्रहरी चौकीले १ सय ८० लिटर जिल्ला प्रहरी कार्यालयले अघिल्लो महिनामा एक सय ५ लिटर गरी सात सय लिटर अवैध घरेलु मदिरा बरामद गरी नष्ट गरेको बताए । जिल्लामा मदिराका कारण कतिपयका घरबार नै विहिन बनेकाले प्रहरीले मदिरा नियन्त्रण अभियान सक्रिय बन्दै गएको छ ।

समुदायसंग प्रहरी साझेदारी कार्यक्रमलाई सफल बनाउका लागि प्रहरीले सडक सुरक्षा,अपराध नियन्त्रण,बाल विवाह,बहुविवाह लगायतका बारेमा जनचेतना मुलक सन्देश दिदै आएको प्रहरी निरिक्षक तथा सुचना अधिकारी लोकेन्द्रसिंह गुरुको भनाई रहेको छ ।