सिन्धुली — कांग्रेस प्रमुख सचेतक श्याम घिमिरेले कार्यविधि बदलेर भए पनि फास्टट्याकबाट बाढीपहिरो पीडितलाई राहत वितरण गर्न र पुनःस्थापनाको काम अघि बढाउन सरकारसँग माग गरेका छन् ।

पीडित परिवारजनलाई घरघरै पुगेर भेटिरहेका प्रमुख सचेतक घिमिरेले शनिबार गृहमन्त्री रमेश लेखकलाई समेत फोनबाट छिटोभन्दा छिटो राहत तथा आवासको व्यवस्था गर्न माग गरेका हुन् । ‘पीडितहरूले जसोतसो दसैं धानेका छन्,’ उनले भने, ‘अन्नबाली भित्र्याउने समयमा बगर भएको खेत र नामोनिसान नराखी पहिरोले बगाएको घरगोठ हेरेर पीडितहरू सरकारी सहयोगको आशामा छन् । कार्यविधि झन्झटिलो भएकाले त्यसलाई परिमार्जन गरी तत्काल राहत वितरण गर्नु पर्‍यो ।’

प्रधानमन्त्री राहत कोषमा अर्बौं रकम जम्मा हुने र पीडितहरू भने खान नपाएर भोकभोकै बस्नुपर्ने अवस्था आएकाले तत्काल सरकारी काम छिटोछरितो हुनुपर्ने उनको भनाइ थियो । व्यक्तिगत करिब १० लाख खर्चेर सिन्धुलीको गोलन्जोर र फिक्कलका एक सय बढी बाढी पहिरो पीडितलाई राहत वितरण गरेका प्रमुख सचेतक घिमिरेले सुनकोसी, गोलन्जोर र फिक्कललाई क वर्गमा राखेर क्षतिको विवरण संकलन गरी राहत तथा पुनःस्थापनाको काम हुनुपर्ने खाँचो औंल्याए ।

सिन्धुलीमा प्रारम्भिक चरणको तथ्यांक अनुसार बाढीपहिरोबाट २ सय ६३ घर पूर्ण र २ सय २५ घरमा आंशिक क्षति पुगेको छ । बीपी राजमार्गको चार स्थानमा सडक बगाएको छ भने २ वटा पक्की तथा २३ वटा झोलुंगे पुल बगाएको छ । हालसम्म संघसंस्था तथा व्यक्तिगत सहयोगमा ९ सय १८ जनालाई ७८ लाख ९१ हजार रुपैयाँ बराबरको राहत सामग्री वितरण गरिएको प्रशासनले जनाएको छ ।

कान्तिपुरबाट