धनगढीः कैलालीको धनगढीमा शिवशिखर बहुद्देश्यीय सहकारी संस्थामा बचतकर्ताको भिड लागेको छ। धनगढी उपमहानगरपालिका–१ धनगढीमा रहेको शिवशिखर बहुद्देश्यीय सहकारी संस्थामा लगानी डुब्ने चिन्ताले शेयरधनी बचतकर्ता रकम फिर्ता माग्न अहिले जम्मा भएका छन्। शिवशिखर सहकारीमा रकम जम्मा गर्दै आएका ग्राहकले रकम फिर्ता मागिरहेका हुन्।

रकम फिर्ता माग्नैकै लागि आज सहकारीमा बचतकर्ताको भिड छ। भक्तपुर केन्द्रीय कार्यालय रहेको उक्त सहकारीको धनगढी शाखा शेयरधनीले घेराउ गरेका छन्। दैनिक बचत, फिक्स बचतकर्तादेखि ठूलो रकम सेयर लगानी गरेका ग्राहकले आफ्नो लगानी डुब्न लागेको भन्दै रकम फिर्ता माग्न शाखा कार्यालय पुगेका छन्। शिवशिखरकै बुटवल शाखामा बचतकर्तामाथि ठगी भएको विषय बाहिर आएपछि त्यसको प्रभाव कञ्चनपुरहुँदै कैलालीसम्म परेको हो।

सहकारीले दैनिक चल्ती खातामार्फत रकम संकलन गर्दै आएको थियो। सहकारीमा राखिएको पैसा जोखिममा परेकोले फिर्ता माग्न आएको उनीहरुले बताएका छन्। सहकारीमा रकम सुरक्षाका लागि राखे पनि जोखिमा पर्न थालेपछि फिर्ता लिन आएको बचतकर्ताले बताएका छन्। ‘अब हामीलाई ब्याज चाहिँदैन,’ एक जना बचतकर्ताले भने, ‘हाम्रो बचत भएको रकम फिर्ता गरिदिनुप¥यो।’

सहकारीप्रति जनताको विश्वास गुमिरहेका वेला सहकारीले रकम फिर्ता गर्नुको विकल्प नभएको उनीहरुको माग छ। सहकारीले जनताबाट संकलन गरेको रकम जम्मा वा अन्य क्षेत्रमा लगानी गरेको भए पनि फिर्ता गर्नुपर्ने बताइएको छ। फसाउने उद्देश्यले ग्राहकबाट संकलन गरिएको रकम तुरुन्तै फिर्ता नभए आन्दोलन गर्ने चेतावनी बचतकर्ताको छ। आइतबारदेखि बचत फिर्ता लिन सेवाग्राही सहकारीमा धाउँदै आए पनि सहकारी बन्द गरेर कर्मचारी सम्पर्कविहिन भएको उनीहरुको गुनासो छ। दिनेश खबरबाट