डीबी विष्ट कार्तिक १५ बझाङ । जिल्लाको शान्ति सुरक्षाको लागी थपबल दिन शसत्र प्रहरीबलको एक टोली स्थाई रुपले बझाङमै बस्ने गरि पहिलो पटक सदरमुकाम चैनपुर आएको छ ।

यस अगाडी नेपाल प्रहरी नेपाली सेना रहेको जिल्लामा शसत्र प्रहरी आएपछि सरकारका तिनवटै सुरक्षा निकायको जिल्लामा उपस्थिती भएको छ ।

शसत्र प्रहरी नायव उपरिक्षक भुवनराज पन्तको नेतृत्वमा ३० जना शसत्र प्रहरीको टोली मंगलवार जिल्लामा आएर चैनपुरमा रहेको तत्कालिन कृषि विकास कार्यालयमा क्याम्प बनाएर बसेको छ ।

गत जेठ २७ गते नेपाल सरकारले शसत्र प्रहरीलाई देशभरका सवै जिल्लामा उपस्थित गराउने र्निणय अनुसार सुदुरपश्चिमका बाजुरा र बझाडमा पहिलो पटक शसत्र प्रहरीबलको टोली पठाएको टोलीमा आएका शसत्र प्रहरीका डिएसपी भुवनराज पन्तले जानकारी दिए ।
बझाडका लागी १ सय ४१ जनाको दरबन्दी भएपनि सुरुमा क्याम्प व्यवस्थापन गर्न समस्या हुने भएकाले ३० जनाको मात्र टोली आएको छ । क्याम्प व्यवस्थित भएपछि दरबन्दी अनुसार सवै जनशक्ति आउने भएको पनि डिएसपीको भनाई छ ।

सुदरपश्चिमका सवै जिल्लामा शसत्र प्रहरीको कार्यालय भई सकेको र बाजुरा र बझाडमा मात्र बाँकी भएकाले दुवै जिल्लामा एकै दिन शसत्र प्रहरीबल न .३६ गठ दिपायल वाट टोली आएको हो ।

जिल्लामा सशत्र प्रहरी आएपछि बुंगोल नगरपालीकामा एउटा युनिट बस्ने र आवस्यकता हेरि सिमा क्षेत्र धुलीमा पनि शसत्र प्रहरीको युनिट बस्ने भएको छ ।
पहिलो पटक शसत्र प्रहरीबलको टोली जिल्लामा बस्ने गरेर आएपछि जिल्लावासीहरु हर्षित भएका छन् । जिल्लावासीहरुले पनि यस अगाडी पटक पटक बझाडमा शसत्र प्रहरीको बल आउनु पर्ने माग गर्दै आएका र उनिहरु आएपछि शान्ति सुरक्षामा थप राम्रो हुने नागरिक समाजका धर्मजंग सिंहले वताए ।