काठमाडौं : नेपाल टी २० लिगको दोस्रो क्वालिफायरमा विराटनगर सुपर किङ्ग्सले जनकपुर रोयल्सलाई एक सय ६८ रनको लक्ष्य दिएको छ। त्रिवि क्रिकेट मैदानमा टस जितेर ब्याटिङ थालेको विराटगरले चार विकेटको क्षतिमा एक सय ६७ रनको योगफल तयार गर्यो।

पहिलो विकेटका लागि ५९ रनको साझेदारी गर्दै ओपनर गौरान्सु शर्मा र अर्जुन साउदले राम्रो सुरुआत दिलाएका थिए। गौरान्सुले ४१ बलमा दुई–दुई चौका र छक्का प्रहार गर्दै ४२ रनको इनिङ खेले। अजुर्न ३५ रन जोडेर पेभेलियन फर्के।

यस्तै, हुसेन तलत २१ बलमा ३१ तथा राज ननन १८ बलमा ३३ रन जोडेर पेभेलियन फर्किँदा अन्य ब्याटरको प्रदर्शन उल्लेख्य रहेन। बलिङतर्फ जनकपुरका लागि जितेन्द्र मुखियाले दुई विकेट लिए। शारफुद्दिन असरफ र ललित राजवंशीले एक–एक विकेट लिए।

जनकपुरको टिम नआइपुग्दा समयमा टस हुन सकेको थिएन। दिउँसो १२ः०० बजे सुरु हुने तय भएको खेल करिब आधा घण्टा ढिलो मात्रै सुरु भएको थियो।

समूह चरणबाट दोस्रो स्थानमा रहँदै प्ले अफमा पुगेको जनकपुर पहिलो क्वालिफायरमा लुम्बिनी अल स्टार्ससँग पराजित भएको थियो।

विराटनगर इलिमिनेटरमा काठमाडौं नाइट्सलाई पराजित गर्दै दोस्रो क्वालिफायरमा आइपुगेको हो। फार वेस्टर्न युनाइटेड र पोखरा समूह चरणबाटै बाहिरिइसकेका छन्। अन्नपुर्णबाट