धनगढी,२५ असोज । एफएमडिसी, बिकास र सामाजिक परिवर्तनका लागि सञ्चारको १६ औं स्थापना दिवसको अवसरमा मालपोत र नापी कार्यालयमा सेवाग्राहीले भोग्नुपरेका समस्याका बारेमा छलफल कार्यक्रम सम्पन्न भएको छ ।

एफएमडिसीले स्थापना दिवसको अवसरमा गर्दै आएको जहाँ समस्या त्यहाँ समाधान खोज्ने प्रयास कार्यक्रम अन्र्तगत मालपोत र नापी कार्यालयमा आउने गुनासाहरुलाई कसरी समाधान गर्न सकिन्छ भनेर कार्यक्रमको आयोजना गरिएको हो ।
सेवाग्राहीले सानो कामका लागि पनि भन्झट भोग्नुपरेको गुनासो गरेका थिए । मालपोत र नापी कार्यालयमा आउने अधिकाश सेवाग्राहीले जग्गा पास गर्न पनि एक हप्ता लाग्ने, लेखापढी व्यवसायि र कर्मचारी मिल्ने फाईल लिएर बिभिन्न तरिकाले पैसा माग्ने, सहि सुचना कसैले पनि नदिने,कर्मचारीका ढिला सुस्ती र प्रक्रियामा सरलीकरण नहुदा समस्या भोग्नुपरेको गुनासो गरेका थिए ।

कार्यक्रममा वरिष्ठ पत्रकार तथा एफएमडिसीका संस्थापक अध्यक्ष उमीद बागचन्दले २०५९ सालमा मिडिया संस्थाको रुपमा स्थापना भएको एफएमडिसीले बिगत देखि अहिले सम्म गरेका कामको जानकारी गराउनुभएको थियो ।

उहाँले कार्यक्रममा संस्थाले स्थापना दिवसका अवरमा जहाँ समस्या त्यहाँ समाधान भन्ने उदेश्यले मालपोत र नापी कार्यालमा सेवाग्राही र आम सरोकारवाला नागरिकले भोग्दै आएका समस्यालाई समाधान गर्न कार्यक्रम गरेको बताए ।
कार्यक्रममा आएका गुनासोको सम्बोधन गर्दै मालपोत कार्यालयका प्रमुख ठाकुरप्रसाद सिग्देल आफुहरुको काम नै सेवाग्राहीको हितका लागि रहेको बताए । आएका समस्याहरुलाई समाधान गर्न आफु प्रतिबद्ध भएको पनि बताए ।

त्यस्तै नापी कार्यालयका प्रमुख दयानन्द जोशीले जग्गा र क्षेत्रफल नमिल्ने बिषयमा व्यवहारिक रुपमा कठिनाई भएको बताए ।
आएका गुनासाहरुको सम्बोधन गर्दै उहाँले काम गर्ने क्रममा केही प्रक्रियागत समस्याहरु आए आफुलाई जानकारी गराउन आग्रह समेत गर्नुभयो ।
नापी कार्यालयमा सेवाग्राहीलाई सहज गर्नका लागि आगामी दिनमा धेरै कुरा सुधार हुने बिश्वास समेत व्यक्त गर्नुभयो ।
कार्यक्रमा जिल्ला बार कैलालीका अध्यक्ष प्रेम चन्दले आम सेवाग्राहीलाई कामकारर्वाहीमा सहज बनाउन कसरी सकिन्छ भन्ने तिर ध्यान दिन जरुरी रहेको बताए ।
कार्यक्रमको सञ्चालन एफएमडिसीका अभियान अधिकारी निराजन परियारले गर्नुभएको थियो ।