रमित बि.क.बाजुरा ८ असोज ।  जिल्लामा आजबाट अन्नते मेलाको रौनक बढेको छ । भाद्र पूर्णिमाको दिनबाट सुरु हुने अनन्ते स्थानीयले विशेष महत्वका साथ मनाउने गर्दछन् ।
दशै र तिहार पछिको दोस्रो ठुलोे पर्वका रुपमा मानिने अनन्ते मेला तीन देखि पाँच दिन सम्म खेल्ने गरिन्छ । अनन्ते रातदिन आ–आफ्नै शैली र परम्परा झल्कीने गरी खेल्ने गरीन्छ ।महाभारतमा कौरव सँगको लडाईमा पाण्डवहरुले गरेको विजय प्राप्तिको खुसयालीमा पाण्डवका समर्थक तथा न्यायका पक्षधरले मनाउने विजय उत्सवको रुपमा यो पर्व हरेक वर्ष मनाउने परम्परा रहेको छ ।

अनन्ते सत्यको विजय भएको दिनको सम्झनामा मनाउने गरिन्छ । मेला अवधीभर लाखेनाच, माँगल, पाण्डवहरुको युद्ध कौशल,लडाईको युद्ध नीतिका बारेमा चर्चा परिचर्चा गर्ने गरिएको स्थानीय मोति उखेडाले बताए । अन्यायको अन्त्य भन्ने शब्द अप्रभंस भएर अनन्ते शब्दको उत्पति भएको किवदन्ति रहेको छ ।
ब्रतवन्दमा अनन्तः धारण गर्ने परम्परा रहेकोले यो पर्व पूर्णिमाकोे दिनबाट सुरु गरेर भगवानको भजन कृतन र महापुरुषले गरेका कल्याणकारी कार्यलाई समुदाय बीच गीत गाथाको माध्यमद्धारा सुसुचित गरिने परम्परा रहेको स्थानीय बुद्धिजीवि समेत रहेका उखेडाको भनाई रहेको छ ।
अनन्ते मेला अवधीभर मागल र गीत गाएर महाभारतको युद्धमा कौरव र पाण्डव बीचको युद्ध संवाद,योद्धाले देखाएको युद्ध कुशलता जस्ता कार्यको वर्णन गरेको पाइन्छ ।

स्थानीय लोक सँस्कृति र जिल्लाको पहिचान स्वरुप मनाइने अनन्ते मेला जिल्लाका साविकका गाविसहरु मार्तडी,जुगाडा,आटीचौर,बुढीगंगा,बाह्रविस लगाएत एक दर्जन बढी क्षेत्र धुमधामका साथ मनाइने गरिन्छ ।
देउडा साँस्कृतिको जगेर्ना, आफन्तसँगको भेटघाट र मित्रताको सुरुवादको संकेतका रुपमा पनि यस पर्वलाई मनाउने गरिएको स्थानीय बासीले बताउने गरेका छन् ।

मेलाको अवसर पारेर यतिखेर छिमेकी गाविस,लेक खर्क बेशीबाट आफन्त,गोठाला,विद्यार्थी र कर्मचारी एकै ठाँउमा जम्मा भएका छन् ।