जगतदल जनाला बिक सुर्खेत । नेपाल विद्यार्थी संघ (नेविसंघ)ले मध्यपश्चिमाञ्चल विश्वविद्यालयमा स्वतन्त्र विद्यार्थी यूनियन (स्ववियू)को निर्वाचन तोकिएकै समयमा गराउन माग गरेका छन् ।

विश्वविद्यालयले यहि चैत्र २५ गते निर्वाचन गर्ने भने पनि हाल निर्वाचनका लागि वातावरण नगराएको भन्दै नेविसंघले निर्वाचनको मिति घोषणा एवं विभिन्न मागहरु सहित विश्वविद्यालयका निमित्त रजिष्ट्रार लिलाधर तिवारीलाई प्रेस विज्ञप्ती बुझाएको छ ।
विज्ञप्तीमा विश्वविद्यालयको केन्द्रिय क्याम्पस लगायत १० वटै आंगिक क्याम्पसहरुमा तोकिएको मितिमा निर्वाचन गराउन आवश्यक प्रक्रिया पुरा गरी स्ववियू निर्वाचन कार्यतालिका सार्वजनिक गर्न २ दिनको समयसिमा तोकिएको छ ।

साथै विद्यार्थी संघसंगठन ईन्जिनियरिङ संकायका विद्यार्थीहरु, स्ववियू लगायत विश्वविद्यालयसंग सम्बन्धित सरोकारवाला पक्षहरुसँग गरिएका सम्झैताहरु तत्काल कार्यान्वयन गनुपर्ने, राजनैतिक आस्थाका आधारमा शक्तिको आडमा गरिएको राजनैतिक हस्तक्षेप बन्द गर्नुपर्ने, अदातलमा विचाराधिन रहेको निजी सम्बन्धन प्रक्रिया अन्र्तगत कमिसनको खेल एवम् निजी स्वार्थका आधारमा ग्लोबल कलेजलाई दिइएको सम्बन्धन खारेज गरी विना सूचना विश्वविद्यालयले उक्त कलेजलाई थप गरिएका कार्यक्रम समेत खारेज गर्न माग गरिएको छ ।
साथै विज्ञप्तीमार्फत तोकिएको समयसिमाभित्र कार्यतालिका घोषणा नभएमा, तत्काल माग पूरा नभएमा र निर्वाचनको वातावरण सिर्जना गर्न ढिलाइ भएमा नेविसंघले थप आन्दोलनका कार्यक्रमहरु घोषणा गर्न बाध्य हुने जानकारि गराइएको छ ।

साथै नेविसंघका निवर्तमान केन्द्रीय सहमहामन्त्री ईश्वर विष्ट, निवर्तमान केन्द्रीय सदस्य हरी शर्मा, निवर्तमान केन्द्रीय सदस्य अनिलबहादुर शाही र निवर्तमान केन्द्रीय सदस्य विवेक आचार्यद्वारा हस्ताक्षरित विज्ञप्तीमा नेविसंघ निर्वाचनको पक्षमा इमान्दार रहेको भन्दै निर्वाचनको पक्षमा एकताबद्धहुन विद्यार्थीहरुलाई अनुरोध गरिएको छ ।