काठमाण्डौ प्रधान सेनापति महारथी श्री प्रभुराम शर्माले महाशिवरात्री तथा नेपाली सेना स्थापनाको २६० औं वार्षिकोत्सवको अवसरमा आज मिति २०७९/१०/२८ गते Unity, Team Spirit and Strength भन्ने नारासहित आयोजना गरिएको आठौं संस्करणको COAS Open Marathon and Run For Fun-2079 अन्तर्गत ४२.१९५ कि.मि. खुल्ला म्याराथनमा प्रथम हुने नेपाली सेनाका सिपाही राजन रोकायलाई पुरस्कृत गर्नु भएको छ ।

कार्यक्रममा ४२.१९५ किलोमिटर म्याराथन (खुल्ला पुरुष), २१ किलोमिटर हाफ म्याराथन (खुल्ला महिला/पुरुष), सैनिक सहचारी, उपत्यका भित्र अवस्थित सैनिक महाविद्यालय/विद्यालय तथा राष्ट्रिय सेवा दलका क्याडेटहरु र नेपाली सेनाका अधिकृतहरुको सहभागितामा १० कि.मि. दौड (महिला/पुरुष) तथा नेपाली सेना लगायत अन्य सुरक्षा निकायका पदाधिकारीहरु, सैनिक श्रीमती संघका पदाधिकारीहरु एवं अतिथिहरुका लागि ५ किलोमिटर वाकाथन समावेश गरिएको थियो ।

नेपाल ओलम्पिक कमिटिका अध्यक्ष, नेपाल एथ्लेटिक्स संघका अध्यक्ष, पूर्व प्रधान सेनापतिहरु, रक्षा सचिव, बहालवाला तथा अवकाश प्राप्त रथीवृन्द, काठमाण्डौं महानगरपालिकाका पदाधिकारीहरु, सैनिक श्रीमती संघका पदाधिकारीहरु, सैनिक सहचारीहरु, संचारकर्मी तथा खेल प्रेमी दर्शकहरुको उपस्थिती रहेको विशेष समारोहमा सैनिक व्याण्डबाट सांगितिक कार्यक्रम प्रस्तुत गरिनुका साथै विभिन्न विधामा विजयी धावकहरुलाई पुरस्कार वितरण गरिएको थियो ।

कार्यक्रमको विभिन्न विधामा विजयी/पुरस्कृत धावकहरुको विवरण यसैसाथ संलग्न गरिएको छ ।