धनगढी,३० भदौं । धनगढी उप–महानगरपालीकाको बेभबेसमा आधारित पूर्वाधार ब्यबस्थापन प्रणालीको शनिवार प्रदेश नं ७का मुख्य मन्त्री त्रिलोचन भट्टले उद्घाटन गरेका छन् । वेभका माध्यमबाट पूर्वाधार विकासका सबै सूचना तथा जानकारीहरु दिने प्रणाली संचालनमा ल्याउने धनगढी उप–महानगरपालीका देशमै पहिलो हो । प्रदेश सरकारले पहिलो बैठकमै सबै सरकारी कार्यालयलाई सूचना प्रविधी मैत्री बनाउने निर्णय गरिएको थियो मुख्य मन्त्री त्रिलोचन भट्टले भने,‘धनगढी उप–महानगरपालीका देशमै पहिलो भएकोमा बधाई दिन चाहन्छु । उनले यो प्रणाली संचालनमा निरन्तरता दिनु चुनौतीपूर्ण रहेको बताए । उनले धनगढी उप–महानगरपालीकाले संचालनमा ल्याएको प्रविधीको प्रभावकारीता हेरेर प्रदेशभरीका सरकारी कार्यालयमा संचालन गर्न प्रोत्साहीत गरिने पनि बताए ।

बेभ बेसमा आधारित पूर्वाधार ब्यबस्थापन प्रणालीले नगर क्षेत्रमा संचालन भएका योजनाको सुरुवाती चरण देखि कर्यान्वयनको चरणहरुको जानकारी मोवाईल एप्सको माध्यमबाट लिन सकिन्छ । स्मार्ट फोनको प्रयोग गरेर सबै बस्ती र वडाका योजनाको अबस्था बुझ्न सकिने भएकाले यो प्रणालीबाट जनताको सूचनाको हक तथा सुशासन प्रवर्दन हुने पनि मुख्य मन्त्री भट्टले बताए ।

प्रदेश नं ७ का भौतिक पूर्वाधार तथा यातायात मन्त्री पठान सिंह बोहराले धनगढी उप–महानगरपालीकाले सुरुवात गरेको यो प्रणालीको प्रभाव अन्य स्थानीयतहमा पनि पर्ने बताए । उनले भने,‘जनताले सरकारका सबै गतिविधीहरु जान्न पाउनु पर्छ । चाडै नै प्रदेशका मन्त्रालयमा यो प्रणाली लागु गरिने पनि मन्त्री बोहराले बताए । उनले भने,‘सरकार सधै खुला र पारदर्शी हुनुपर्छ ।

जिल्ला समन्वय समिति कैलालीका संयोजक सूर्यबहादुर थापाले सबै जनप्रतिनिधीहरु केहि गर्न चाहिरहेको भएपनि गर्न नसकिरहेको बताए । उनले भने,‘यसमा कानुनी जटिलता छन् यो जटिलताबाट पार लाग्नुपर्छ । धनगढी उप–महानगरपालीकाका प्रमुख नृपबहादुर वडले नगरका काम कार्वाहीहरु खुला र पारदर्शि बनाउनका लागि  बेभ बेसमा आधारित पूर्वाधार ब्यबस्थापन प्रणाली संचालनमा ल्याएको बताए । उनले भने,‘नगरका हरेक गतिविधीहरुमा नागरिकको निगरानी हामीले चाहेका छौं । बेभ बेसमा आधारित पूर्वाधार ब्यबस्थापन प्रणाली संचालनमा आएकाले यसको धेरैभन्दा धेरै प्रयोग गर्न पनि नगरप्रमुख वडले नगरवासी संग आग्रह गरे । कैलालीका प्रमुख जिल्ला अधिकारी बाबुराम श्रेष्ठले हेर्दा सामान्य जस्तो लागेपनि बेभ बेसमा आधारित पूर्वाधार ब्यबस्थापन प्रणाली महत्वकांक्षी योजना भएको बताए । उनले भने,‘यसले सुशासनका क्षेत्रमा केहि समय भित्रै प्रतिफल दिन थाल्ने छ । कैलालीको गोदावरी नगरपालीकाका प्रमुख हरी सिंह साउँदले स्थानीय सरकारले हिजोकै शैलीमा काम गरेमा चाहेको उपलब्धी हात नपर्ने बताए । उनले भने,‘लोकतन्त्रको संस्थागत बिकास गर्नका लागि पनि बेभ बेसमा आधारित पूर्वाधार ब्यबस्थापन प्रणालीले सहयोग गर्ने छ ।

धनगढी उप–महानगरपालीकाकी उप–प्रमुख सुशिला मिश्र भट्टले बेभ बेसमा आधारित पूर्वाधार ब्यबस्थापन प्रणाली सुरु गर्ने देशकै पहिलो नगरी बनाउन सहयोग गर्ने सबैलाई धन्यवाद दिईन । उनले भनिन्‘यसको उपयोग गर्नका लागि नागरिकतहमा जानकारी दिनु हामी संग चुनौती छ ।

बेभ बेसमा आधारित पूर्वाधार ब्यबस्थापन प्रणाली विकासमा योङ्ग ईनोभेस कम्पनी काठमाण्डौको प्राविधीक सहयोग, किङ्गस् कलेज काठमाण्डौको अनुसन्धान र धनगढी उप–महानगरपालीको सहयोग रहेको छ ।