अछाम १२ भदौ । कञ्चनपुरमा बलात्कारपछि हत्या गरिएकी निर्मला पन्त घटनाको सत्यतथ्य छानविन गरी दोषिलाई कार्वाहीको माग गर्दैमंगलसेनमा र्‍याली निकालिएको छ । सदरमुकाम मंगलसेनमा अन्र्तपार्टी महिला सञ्जाल, महिला मानवअधिकार रक्षक सञ्जाल, मानवअधिकारकर्मी, नागरिक समाज, अधिवक्ता, पत्रकार लगायतले घटनालाई बंग्याएर दोषिलाई उम्काउन खोजिएको भन्दै विरोध गरेका छन् ।

‘निर्मला पन्तका हत्याका अपराधिलाई कार्वाही गर, विधिको शासनको पालना गर, मानवअधिकारको रक्षा गर’ जस्ता नारा सहित बजार परिक्रमापछि कोणसभामा व्यक्ताहरुले घटनाको चाँडो छानविन गरी दोषिलाई हदैसम्मको कार्वाहरु गर्न माग गरिएको छ । कोणसभमा बोल्दै अधिवक्ता कृष्णप्रसाद ढुंगानाले निर्मला पन्तका घटनाको तत्काल छानविन गरी अभियुक्त र मतियारलाई कानुनी कार्वाही गर्न माग गरे ।
अन्र्तपार्टी महिला सञ्जालका अध्यक्ष विन्दु रावलले बलात्कारका घटना बढीरहेको भन्दै यसमा सरकार र गृहमन्त्रालयको विशेष ध्यान दिन आग्रह गरिन् । नागरिक समाजका अध्यक्ष शंकरबहादुर रावलले घटनाका वास्तविक अपराधिलाई बचाउन खोज्दा छानविनमा ढिलाइ भइरहेको बताए । अधिकारकर्मीहरुले देशका विभिन्न भागमा बलात्कारका घटनाहरु बाहिर आइरहेको भन्दै यसलाई सरकारले सम्वेदनशिल रुपमा हेर्न अनुरोध गरेका छन् ।