रमित बि.क.बाजुरा । बढालेक दशरथ धार्मीक तथा शैक्षिक महोत्सवको तयारी तिब्र पारिएको छ ।

विद्यालयको शैक्षिक तथा भौतिक विकासका लागि खप्तड छेडेदह गाउँपालिका ७ स्थित दशरथ मावि आटीचौरमा लाग्ने धार्मीक तथा शैक्षिक महोत्सवको आयोजक समितिले तयारी तिब्र पारेको छ ।

महोत्सव फागुन १४ देखि २१ गतेसम्म सञ्चालन हुनेछ । हालसम्म ७ सय बढी कशल संकलन गरिसकेको छ, भने २ लाख बढीको आर्थिक सहयोग पनि संकलन गरिसकेको विद्यालयले बताएको छ ।
विद्यालयको खेल मैदानको स्तरोन्नी र विद्यालयमा प्राविधिक शिक्षा सञ्चालनका लागि महोत्सव सञ्चालन गर्न लागिएको विद्यालय व्यवस्थापन समिति अध्यक्ष दिर्घमति देवी ओलीले बताएकी छन् । महोत्सव हिन्दुहरुको ठूलो पर्व महाशिवरात्री मेलाको अवसर पारी आठ दिनसम्म चल्ने भएको छ । विद्यालयको शैक्षिक सुधार, सकारात्मक सोचाइ र ज्ञान आर्जनमा केन्द्रीत गरेर महोत्सव आयोजना गर्न लागिएको विद्यालयका प्रअ खडक सिंह विष्टले बताएका छन् ।
विद्यालयले सु–संस्कार समाज निर्माण अभियान नेपालसँगको सहकार्यमा महोत्सव गर्न लागिएको हो । महोत्सव आयोजक कमिटीले विभिन्न ठाउँमा आर्थिक श्रोत संकलनका लागि टोली खटाएको छ । आयोजक समिति संयोजक लालबहादुर खड्का, रणबहादुर ओली सहीतको टोली भारतका विभिन्न शहरमा नेपालीसँग श्रोत संकलनमा जुटेका छन् । भने अन्य समिति सदस्य तथा विव्यस समितिका पदाधिकारी जिल्ला भित्र कशस अभियान, चन्द्रा संकलनमा जुटिरहेका छन् ।
गाउँपालिका भित्रकै प्रतिष्ठाको विषय बनिरहेको महोत्सव समारोहलाई भव्य र व्यवस्थीत गर्न र उपलब्धी मुलक बनाउने गरि स्थानीय तह, प्रदेश सरकार तथा जिल्ला स्थित सरकारी तथा गैर सरकारी निकाय बीच परामर्श र छलफलका गतिविधि पनि भईरहेको आयोजक समिति उपसंयोजक खगेन्द्र नाथले बताएका छन् ।
विशुद्ध धर्म र धार्मीकतासँग जोडिएका प्रवचन मात्र नभई समाज विकास, आदर सत्कार, परिवारीक सद्भाव सिर्जना तथा अभिभावक, बुबाआमा प्रतिको श्रद्धा भावको महत्व जस्ता सतचरित्र निर्माणका गतिविधि सञ्चालन गरिने सु–संस्कार समाज निर्माण अभियान नेपालका अध्यक्ष शिविर साधकले बताएका छन् । सकारात्मक समाज निर्माणका लागि प्रवचन मार्फत धारणा विकासमा जोड दिन र विद्यालयको शैक्षिक अवस्थामा सुधार ल्याउन महोत्सव गर्न लागिएको हो ।
महोत्सवको अवसरमा भजन किर्तन, जीवन उपयोगी प्रवचन, नाचगानका साथ विवाह, तुलादान, ब्रतबन्ध सहीतका धार्मीक कार्यपनि गरिने छ । भव्य खेल मैदान भएको विद्यालयमा छात्रा निर्माण, कृषि तथा भेटेरिनरी तर्फको कक्षा सञ्चालन, खेल मैदानको पर्खाल तथा प्याराफिट निर्माण सहीतका गतिविधिलाई केन्द्र भागमा राखेर महोत्सव गर्न लागिएको विद्यालयका शिक्षक प्रेमबहादुर ओलीले बताएका छन् । मुल आयोजक कमिटीले स्थानीय तहका जनप्रतिनिधी राजनीतिक दल अभिभावक सबै निकायसँगको सहकार्य र आर्थिक तथा अन्य व्यवस्थापनको सम्पूर्ण जिम्मेवारी निर्वाह गर्ने भएको छ ।
मन्त्री शाहले उद्घाटन गर्ने
बढालेक दशरथ धार्मीक तथा शैक्षिक महोत्सवको सुदूरपश्चिम प्रदेशका आन्तरिक मामिला तथा कानुन मन्त्री प्रकाश शाहले उद्घाटन गर्नु हुने भएको छ । फागुन १४ गतेदेखि फागुन २१ गते सम्म विद्यालयको शैक्षिक तथा भौतिक विकासका लागि खप्तड छेडेदह गाउँपालिका ७ स्थित दशरथ मावि आटीचौरमा लाग्ने धार्मीक तथा शैक्षिक महोत्सवको मन्त्री शाहले उद्घाटन गर्ने आयोजक समिति उपसंयोजक खगेन्द्र नाथले बताउनुभएको छ ।