काठमाडौँ  २७ असार । कलाकार काजल कर्णले नेपाली फिल्म ‘चिरञ्जीवी भव:’ को छायाङ्कनका क्रममा आफूले मधेसी भएकै कारण जातीय तथा क्षेत्रीय विभेद, अपमान र मानसिक दुर्व्यवहार भोग्नुपरेको आरोप लगाएकी छन् ।

सामाजिक सञ्जाल फेसबुकमा लामो स्ट्याटस लेख्दै कर्णले फिल्ममा अनुबन्ध भएपछि निकै उत्साहित भए पनि छायाङ्कन सेटमा पुगेपछि कलाकारका रूपमा होइन, विभेदको सिकारका रूपमा व्यवहार गरिएको दाबी गरेकी हुन् ।

उनका अनुसार सुरुमै आफूलाई पोसाक व्यवस्थापनदेखि यातायातसम्मको विषयमा समस्या सिर्जना गरिएको थियो । छायाङ्कनका क्रममा मेकअप रुममा अपमानजनक व्यवहार गरिएको, आफ्नो स्क्रिप्टमा नभएका दृश्य गर्न बाध्य पारिएको तथा आफूलाई ‘मधेसी’ भन्दै बारम्बार होच्याइएको आरोप उनले लगाएकी छन् ।

कर्णले मेकअप आर्टिस्टले जानीजानी अनुहारमा कालो मेकअप लगाएको, आफूलाई ‘आश्रममा काम गर्ने’, ‘गाई–गोठालो हेर्ने’ पात्र भन्दै अपमान गरिएको तथा ‘तराईको मान्छे’ भन्दै भैँसी र गाई बोलाएर देखाउनसमेत भनिएको उल्लेख गरेकी छन् । सेटमा आफूलाई ‘यो मधेसी’ भन्दै मजाक बनाइएको उनको दाबी छ ।

उनले स्क्रिप्टमा उल्लेख नभएका फोहोर उठाउने र कुचो लगाउने दृश्य गराइएको तथा दुई दिनसम्म कलाकारभन्दा मजदुरजस्तो व्यवहार गरिएको पनि आरोप लगाएकी छन् ।

पारिश्रमिकको विषयमा पनि कम्पनीले बेवास्ता गरेको उनको भनाइ छ । बाँकी पारिश्रमिक र लुगा खर्च माग्दा इटहरी बोलाएर आफ्नो स्थानमा अर्कै कलाकार राखिएको थाहा पाएको तथा कुनै जानकारीबिनै निर्देशक दीपकप्रसाद आचार्यको निर्देशनमा फिल्मबाट हटाइएको दाबी कर्णले गरेकी छन् ।

उनले यो घटना व्यक्तिगत पीडा मात्र नभई नेपाली फिल्म उद्योगभित्र मधेसी कलाकारले भोग्नुपरेको विभेदपूर्ण मानसिकताको उदाहरण भएको उल्लेख गर्दै ‘मधेसी हुनु नै हाम्रो गल्ती हो’ भन्ने प्रश्न गरेकी छन् । एउटा भूमिका खोसिँदैमा आफ्नो सपना नसकिने भन्दै उनले आफू र आफूजस्ता मधेसी कलाकारका अधिकारका लागि लडिरहने प्रतिबद्धता व्यक्त गरेकी छन् ।

यसैबिच, काजल कर्णको स्ट्याटस सेयर गर्दै सामाजिक अभियन्ता उषा रजकले घटनाले चलचित्र क्षेत्र मात्र होइन, अधिकांश कार्यस्थलमा देखिने संरचनागत विभेदलाई उजागर गरेको टिप्पणी गरेकी छन् ।

रजकले मुख्य र सहायक कामदारबिचको विभेद, जातीय तथा क्षेत्रीय भेदभाव, जानकारीबिनै कलाकार वा कर्मचारी प्रतिस्थापन, पारिश्रमिक सम्बन्धी अन्याय तथा गरिएका प्रतिबद्धता पूरा नगर्ने प्रवृत्तिलाई अन्त्य गर्नुपर्ने उल्लेख गरेकी छन्।

साथै, निर्देशक दीपकप्रसाद आचार्यलाई सृजनशील र व्यावसायिक व्यक्तित्वको रूपमा उल्लेख गर्दै उनले यस्तो व्यवहारबारे निर्देशकलाई जानकारी थियो वा थिएन भन्ने प्रश्न उठाएकी छन् । यदि जानकारी नभएको भए अब पीडितसँग माफी माग्दै भविष्यमा नेपाली फिल्म क्षेत्रमा मधेसी तथा अन्य समुदायमाथि यस्ता व्यवहार दोहोरिन नदिने वातावरण बनाउन नेतृत्वदायी भूमिका निर्वाह गर्नुपर्ने सुझाव पनि उनले दिएकी छन्।

यस विषयमा निर्देशक दीपकप्रसाद आचार्य वा फिल्म निर्माण पक्षको आधिकारिक प्रतिक्रिया भने सार्वजनिक भएको छैन ।