काठमाडौं २० माघ । नेपाली कांग्रेसका नेता तथा राष्ट्रियसभामा पार्टी संसदीय दलका नेता कृष्ण प्रसाद सिटौलाले संघीयताको भावनाअनुसार संघीय सरकारले काम गर्न नसकेको बताएका छन्।

राष्ट्रियसभाअन्तर्गतको विधायन व्यवस्थापन समितिको मंगलबार सिंहदरबारस्थित संसद सचिवालयमा बसेको बैठकमा सिटौलाले जुनसुकै दलको नेतृत्वमा सरकार बनेपनि संघीयता भावनाअनुसार संघीय सरकारले काम नसकेको बताएका हुन्।

अहिले प्रदेश र स्थानीय तहका सरकार केन्द्रको मातहतको जस्तो देखिएको उनले गुनासो गरे। संघीयताको भावना बोकेको प्रदेशहरूले समेत आफ्नो अधिकार प्रयोग गर्नै नसकेको जनाउँदै उनले संविधानले अनुसूचीमा व्यवस्था गरेको अधिकारको बाँडफाँटको सूचीमा समेत समस्या रहेको बताए।

सिटौलाले कतिपय ठाउँमा प्रदेश सरकारभन्दा बढी स्थानीय सरकारले राम्रो काम गरेको देखिएको भन्दै संघीयताको कार्यान्वयन सम्बन्धमा प्रतिनिधिसभा र  राष्ट्रियसभा दुवैले मिलेर एउटा साझा दृष्टिकोण बनाउनुपर्नेमा जोड दिए।

बैठकमा अन्तर तह विधायिकी अन्तरसम्बन्ध सम्बन्धी भ्रमणको समीक्षा र मस्यौदा प्रतिवेदन उपर छलफल भएको थियो।