काठमाडौं महानगरपालिकाका प्रमुख बालेन शाहले चढ्दै आएको करिब ८ करोड रुपैयाँ मूल्यको भनिएको कालो रंगको ल्यान्ड रोभर डिफेन्डर गाडीका मालिक को हुन् भन्ने विषय खुलेको छ।

इकान्तिपुरले यातायात व्यवस्था कार्यालय स्रोतलाई उद्धृत गर्दै जनाएअनुसार उक्त गाडी त्रिमूर्ति इन्डस्ट्रिज प्रालिको नाममा दर्ता छ। यस कम्पनीका प्रमुख लगानीकर्ता कमल मालपानी हुन्।

मालपानीले बालेन शाहलाई उक्त गाडी आफूहरूले नै उपलब्ध गराएको कुरा स्वीकार गरेको पनि इकान्तिपुरले लेखेको छ । मालपानीको बुटवलमा श्रीराम टोबाको प्रालि नामक कम्पनी पनि रहेको छ, जसले भोला गुट्खा र जित सुर्ती उत्पादन गर्ने गर्छ।

बालेन शाहले काठमाडौं महानगरपालिकाको प्रमुखका रूपमा कार्यरत रहँदा एक पटक गुट्खा बिक्रीमा प्रतिबन्ध समेत लगाएका थिए। यद्यपि, मालपानी विभिन्न सञ्चारमाध्यमका रिपोर्टहरूमा विवादस्पद व्यवसायीका रूपमा चित्रित गरिएको देखिन्छ । तीन दिनअघि मात्र नेपाल आज नामक अनलाइनले सुपारी तस्करीसँग उनको नाम जोड्दै समाचार प्रकाशित गरेको थियो।

सार्वजनिक रूपमा गाडीको मूल्य करिब ८ करोड रुपैयाँ भनिए पनि, वास्तविक रूपमा नेपालमा ल्यान्ड रोभर डिफेन्डरको मूल्य भेरियन्टअनुसार करिब ४ करोड ६५ लाखदेखि ५ करोड ५० लाख रुपैयाँसम्म पर्ने देखिन्छ।