काठमाडौं १३ पुष । नेपाली कांग्रेसले २०७९ वैशाख र मंसिरमा भएको स्थानीय तह, प्रदेश र संघीय निर्वाचनका समयमा पार्टीहित विपरित कार्य गरेको भन्दै कारबाहीमा परेका सबै नेता–कार्यकर्ताको कारबाही फुकुवा गरेको छ।

नेपाली कांग्रेसको शनिबार बसेको केन्द्रीय कार्यसम्पादन समितिको बैठकले गरेका निर्णयलाई कार्यारत आइतबार पार्टी मुख्यालयले पत्राचार गरेपछि उनीहरुमाथि गरिएको अनुशासनको कारबाही स्वत फुकुवा भएको हो।

यसअघिका निर्वाचनमा पार्टीका आधिकारिक उम्मेदवारविरुद्ध बागी उम्मेदवारी दिएका, तथा त्यस्ता बागी उम्मेदवारको समर्थक र प्रस्तावक बसेका तथा उनीहरुको पक्षमा मत मागेका सबैको कारबाही फुकुवा भएको हो।

पार्टी केन्द्रीय कार्यालयका मुख्यसचिव कृष्णप्रसाद पौडेलले आइतबार पार्टीका मातहतका कार्यसमितिलाई यसबारे जानकारी गराएका छन्।

परिपत्रमा भनिएको छ,‘विगतको निर्वाचनमा पार्टीको उम्मेदवार वा पार्टीले समथृन गरेका उम्मेदवारका विरुद्ध उम्मेदवार भएका, तिनका प्रस्तावक र समर्थक वा असहयोग गरी अनुशासन विपरीतका काम गरेकाहरूलाई केन्द्रीय अनुशासन समितिले गरेको निष्काशन, निलम्वन र पार्टीको विधानअनुसार स्वतः कारबाहीमा परेकाहरूको बाँकी अवधि माफी र मिनाहा गर्ने निर्णय गरिएको छ।’

शनिबारको कार्यसम्पादन समितिको बैठकको निर्णायानुसार कारबाही माफी र मिनाहा भएका व्यक्तिहरूको पार्टीको वहाल रहेको पद नरहने गरी क्रियाशील सदस्यलाई निरन्तरता कायम गरी क्रियाशील नवीकरण  हुने छ।