काठमाडौं १३ श्रावण । अमेरिकाको युनाइटेड एयरलाइन्सको ‘बोइङ ७८७–८ ड्रिमलाइनर’ विमानको बायाँ इन्जिनमा उडानको क्रममा खराबी देखिएपछि पाइलटहरूले ‘मेडे कल’ (आपत्‌कालीन सन्देश) पठाए ।

घटनाको समयमा विमान पाँच हजार फिटको उचाइमा थियो ।  यो घटना २५ जुलाईमा भएको थियो, जसको खबर अहिले बाहिर आएको छ । पाइलटहरूले एयर ट्राफिक कन्ट्रोलर (एटीसी) सँग मिलेर परिस्थितिलाई सम्हालेका थिए ।

फ्लाइटअवेयरका अनुसार, विमान २ घण्टा ३८ मिनेटसम्म हावामा रह्यो । यसले राजधानी वासिङ्टनको उत्तर–पश्चिममा चक्कर लगाउँदै इन्धन खाली गर्‍यो ताकि ल्यान्डिङका लागि तौल कम गर्न सकियोस् ।

१२ जुनमा अहमदाबादमा एयर इन्डियाको विमान दुर्घटनाग्रस्त भएको थियो, त्यो पनि बोइङ कम्पनीको ‘७८७–८ ड्रिमलाइनर’ नै थियो । त्यतिबेला उक्त विमान टेकअफको दुई मिनेटपछि दुर्घटनाग्रस्त भएको थियो । त्यस दुर्घटनामा २७० जनाको ज्यान गएको थियो ।

युनाइटेड एयरलाइन्सका पाइलटहरूले ६ हजार फिटको उचाइमा इन्धन खाली गर्ने अनुमति मागेका थिए ।  त्यसपछि एटीसीले अन्य उडानहरूबाट सुरक्षित दुरी कायम राख्न उनीहरूलाई मार्गदर्शन गर्‍यो ।

इन्धन खाली गरेपछि पाइलटहरूले रनवे १९ सेन्टरमा इन्स्ट्रुमेन्ट ल्यान्डिङ सिस्टमको सहायताले ल्यान्डिङको अनुमति मागे ।

ल्यान्डिङपछि खराब इन्जिनका कारण विमान आफैँ रनवेबाट हट्न सकेन र ‘टो’ गरेर हटाउनुपर्‍यो । सोमबारसम्म यो विमान वासिङ्टन डलेस एयरपोर्टमा नै राखिएको थियो । यो घटनामा कसैलाई चोटपटक भने लागेन ।

युनाइटेड एयरलाइन्स र हवाई अधिकारीहरूले यो प्राविधिक खराबीको जाँच सुरु गरेका छन् ।

अमेरिकाको डेनभर इन्टरनेसनल एयरपोर्टमा शनिबार अमेरिकन एयरलाइन्सको ‘बोइङ ७३७ म्याक्स ८ विमान’ को ल्यान्डिङ गियरमा खराबीका कारण टेकअफ रोकिएको थियो ।

त्यस क्रममा विमानको पछिल्लो भागमा आगो लागेको थियो । यो उडान मियामी जाँदै थियो । विमानमा कुल १७३ यात्रु र ६ क्रू मेम्बरहरू सवार थिए । सबैलाई आपत्‌कालीन स्लाइडमार्फत बाहिर निकालियो ।