धनगढीः बैंक तथा वित्तीय संस्थाको ब्याजदर विरुद्ध सुदूरपश्चिमका व्यवसायी झन आक्रामक बनेका छन्। धनगढीसहित प्रदेशभरका व्यवसायी सोमवारदेखि सशक्त आन्दोलनमा उत्रिएका हुन्।

पाँच दिनसम्म हुने आन्दोलनमा प्रदेशमा सबै जिल्ला तथा नगर उद्योग वाणिज्य संघको ऐक्यबद्धता छ। सुदूरपश्चिमका व्यवसायीले १८ गते कुनै पनि बैंकमा डिपोजिट नगर्ने र माग सम्बोधन नभए चैत १ गतेबाट थप आन्दोलन चर्काउने चेतावनी दिएका छन्।

शनिवार नेपाल उद्योग वाणिज्य महासंघ सुदूरपश्चिम प्रदेशको अगुवाईमा बैंक ब्याजदर विरुद्ध कार्यतालिका तयार गरेर चरणबद्ध विरोध गर्ने निर्णय गरिएको थियो। सुदूरपश्चिममा कैलाली उद्योग वाणिज्य संघसहित प्रदेशका सबै जिल्ला र नगर उद्योग वाणिज्य संघले बैंक तथा वित्तीय संस्थाको चर्को ब्याजदर विरुद्ध संघर्षका रणनीति तय गरेर चरणवद्ध आन्दोलनमा उत्रिएका हुन्।

सरकारले व्यवसायीलाई सडक आन्दोलन गर्न बाध्य बनाएको कैलाली जिल्ला होटल व्यवसायी संघका अध्यक्ष कलम बमले बताए।’सरकारले हामीला आन्दोलन गर्न बाध्य बनाएको छ,’ उनले भने, ‘कोरोनाले थला परेको व्यवासाय लयमा फर्किनै लाग्दा बेंक तथा वित्तीय संस्थाको अचाक्ली व्याजदरले हामी आतङ्कित भएका छौँ।’

कैलाली उद्योग वाणिज्य संघले फागुन ५ गतेदेखि बैंकको व्याजदर विरुद्ध आन्दोलन थालेको हो। बैंकहरूले दोब्बर व्याज बढाएर बैंङ्किङ आतङ्क मचाएको व्यवासायीको आरोप छ। बैंकहरूले कायम गरेको चर्को ब्याज व्यवसायीको मात्रै समस्या नभएर यसले सम्पूर्ण उपभोक्तालाई महङ्गीको मारमा पारेको कैलाली उद्योग वाणिज्य संघका पूर्व अध्यक्ष दिनेशराज भण्डारीले बताए।

‘यो व्यवसायीको मात्रै समस्या होइन्, एक अङ्कमा जवसम्म व्याजदर आउँदैन तवसम्म व्यापार व्यसाय गर्ने अवस्था बन्दैन,’ उनले भने, ‘चर्को व्याजदरको असर व्यवासायीलाई मात्रै परेको छैन, यसले महङ्गी बढाएको छ, यसको असर आम उपभोक्तामा पनि परेको छ।’

बैंकहरूले कालोवजारी गरिरहेको सुदूरपश्चिमका उद्योगी व्यवसायीको आरोप छ। राष्ट्र बैंकले जारी गरेको चालु पुँजी कर्जा मार्ग दर्शन खारेज हुनुपर्ने व्यवसायीले माग गर्दै आएका छन्।

राष्ट्र बैंकको मौद्रिक नीति परिमार्जन गर्नुपर्ने माग देशभर उठेको छ। व्यवसायीले अघि सारेका मागप्रति कुनै सुनुवाई नभए चैत १ गतेबाट कडा आन्दोलन गर्न बाध्य हुने चेतावनी कैलाली उद्योग वाणिज्य संघका उपाध्यक्ष पुष्कर ओझाले दिए। ‘२० गतेसम्म दबाबमुलक कार्यक्रम गर्ने भएका छौँ, माग सुनुवाइ नभए फागुन १ गतेबाट कडा आन्दोलन गर्छौँ,’ उनले भने, ‘कडा आन्दोलनमा देशभरबाट ऐक्यबद्धता मिल्ने वातावरण बन्न थालेको छ।’

सुदूरपश्चिमका व्यवसायीहरूले सोमवारबाट शुक्रवारसम्म दैनिक ११ बजेसम्म सम्पूर्ण व्यापार व्यवसाय बन्द गर्ने भएका छन्। फागुन १८ गते भने व्यवसायीहरूले बैंकहरूमा पैसा जम्मा नगर्ने भएका छन्। सरकारले व्यवसायीका जायज माग पूरा नगरे देशभर आन्दोलन चर्किने कैलाली उद्योग वाणिज्य संघका अध्यक्ष पुष्पराज कुँवरले बताए।

‘धनगढीबाट सुरू भएको आन्दोलन अहिले प्रदेशभर फैलिएको छ,’ उनले भने, ‘राष्ट्र बैंकले लागु गरेको गलत नीतिमा सुधार नभए आन्दोलन देशभर फैलिनेवाला छ।’

उद्योगी व्यवसायीहरुले राष्ट्र बैंकले लागु गरेको अव्यवहारिक नीतिको सिकार हुनु परेको बताएका छन्। चर्को व्याजदरका कारण आम उपभोक्ता समेत महङ्गीको मारमा परेको भन्दै यहाँको निजी क्षेत्र संघर्षमा उत्रिएको हो। दिनेश खबर