धनगढीः नेपाली सेनाले बोराडाँडी ब्यारेकमा आज र भोलि सैनिक प्रदर्शनीको अवलोकन गर्न पाउने व्यवस्था मिलाएको छ। सुदूरपश्चिम पृतना हेडक्वाटरले नेपाली सेनाको २६० औं स्थापना दिवसको अवसरमा सैनिक प्रदर्शनी अवलोकनको व्यवस्था मिलाएको हो।

शुक्रवार र शनिवार दुई दिनसम्म सर्वसाधारणका लागि खुला गरिएको विविध सैनिक प्रदर्शनीको सुदूरपश्चिम प्रदेश प्रमुख देवराज जोशीले एक समारोहका बिच उद्घाटन गरेका हुन्।

नेपाली सेनाले हरेक वर्ष महाशिवरात्रि अर्थात् सेना दिवसको दिन काठमाडौको सैनिक मञ्चमा विभिन्न सैनिक कवाज, युद्ध कौशल देखाउँदै आएकोमा यो वर्षबाट प्रदेशहरूमा पनि सैनिक प्रदर्शनी राखिएको सुदूरपश्चिम पृतनापति उपरथी विजय थापाले बताए।

पृतनापति थापाले नागरिक सैनिक सम्बन्धको विकास गर्न सेनाले विभिन्न माध्यमबाट काम गरिरहेको बताएका छन्। विभिन्न विपद्को समयमा नेपाली सेनाले जनस्तरमा गएर काम गर्ने गरेको स्मरण गर्दै पृतनापति थापाले नागरिकसँग थप सम्बन्ध विकास गर्ने सैनिक प्रदर्शनी राखिएको बताए।

शुक्रवार नेपाली सेनाका विभिन्न युनिटद्वारा विविध साँस्कृतिक झाँकी प्रदर्शन गरिएको थियो। यस्तै, खुकुरी ड्रिल प्रदर्शन, एरोविक नृत्य, तेक्वान्दो प्रदर्शन र एनसीसी विद्यार्थीहरूबाट नृत्य र कवाज प्रदर्शन गरिएको थियो। प्रदर्शनीमा नेपाली सेनाले प्रयोग गर्ने विभिन्न हतियार, उपकरण, औजार र  रिफ्रेसमन्टका लागि जिप लाइनको व्यवस्था गरिएको छ।

शुक्रवार र शनिवार सर्वसाधारणले प्रदर्शनी अवलोकन गर्न पाउने व्यवस्था मिलाइएको सुदूरपश्चिम पृतना हेडक्वाटरले जनाएको छ। दिनेश खबरबाट