काठमाडौं । राष्ट्रपति निर्वाचनको चर्चा चलिरहेको बेला प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष ओलीबीचको भेटले महत्व राखेकाे छ ।

प्रधानमन्त्री प्रचण्ड र नेकपा एमालेका अध्यक्ष ओलीबीच आज बालुवाटारमा दुई घण्टा वार्ता भएको थियो । उनीहरुबीच आज राजनीतिक तथा समसामयिक विषयमा छलफल भएको हो । बालुवाटारस्थित प्रधानमन्त्रीको सरकारकारी निवासमा वर्तमान राजनीतिक परिदृष्यमा सत्ता गठबन्धनभित्र देखिएका विविध आशंका मेटाउने विषयमासेमेत छलफल भएको बालवाटार स्रोतले जनाएको छ । माओवादी केन्द्रका अध्यक्ष प्रचण्डले कांग्रेसबाट राष्ट्रपति बनाउन लागेको चर्चा चलिरहँदा प्रधानमन्त्री र ओलीबीच केही सातायता बाक्लै भेटवार्ता भइरहेका छन् ।

सरकार गठनताका एमालेबाट राष्ट्रपति बनाउने सहमति भएको बताइए पनि माओवादी केन्द्रले राष्ट्रिय सहमतिका आधारमा राष्ट्रपति बनाउने निर्णय गरेको छ । जसकारण एमाले सशंकित बन्दै आएको छ ।

राष्ट्रपतिको निर्वाचनलाई लिएर सत्ता गठबन्धनमा अविश्वासको बढ्दै गइरहेको बेलामा प्रधानमन्त्री प्रचण्ड भेट्न ओली बालुवाटार पुगेका हुन् ।

राष्ट्रपति निर्वाचनसँगै सरकारको पूर्णताबारेसमेत छलफल भएको थियो । राष्ट्रिय स्वतन्त्र पार्टीलाई दिने भूमिकाबारेसमेत भेटघाटमा चर्चा भएको जनाइएको छ ।

यो भेट विशेषगरी राष्ट्रपति निर्वाचन केन्द्रीत थियो । एमालेले पूर्व सहमति अनुसार राष्ट्रपति आफूले पाउने अडान राख्दै आएको छ भने माओवादीले राष्ट्रिय सहमतिको व्यक्तिलाई राष्ट्रपति बनाउनुुपर्ने तर्क अघि सार्दै आइरहेको छ । इ कागजबाट