धनगढीः कञ्चनपुरका सबै क्रसर उद्योग मापदण्ड विपरीत सञ्चालनमा रहेका पाइएको छ। जिल्लामा सञ्चालनमा रहेका १० वटा क्रसर  उद्योगहरुमा एकले पनि पूर्ण मापदण्डको पालना गरेका छैनन्।

जिल्लाका क्रसर उद्योगहरुमा गरिएको अनुगमनले पूर्ण मापदण्ड पालना नगरिएको पाइएको जिल्ला समन्वय समितिका प्रमुख दुर्गादत्त बोहराले बताए। उनले भने, ‘अनुगमनका क्रममा क्रसर उद्योगले कुनै न कुनै मापदण्ड मिचेको पाइएको छ।’

गृह मन्त्रालयको निर्देशन पछि जिल्ला समन्वय प्रमुख तथा प्रमुख जिल्ला अधिकारी सहितको समूहले क्रसर उद्योगहरुको अनुगमन गरेको थियो। जिल्लामा सञ्चालनमा रहेका उद्योगहरुमध्ये अधिकांशले मापदण्ड मिचेर राजमार्ग, घना बस्ती तथा नदी नजिक सञ्चालन गरेको पाइएको छ। गृह मन्त्रालयको परिपत्र अनुसार क्रसर उद्योग सञ्चालनमा कडाइ गर्ने हो भने, कञ्चनपुरका सबै क्रसर बन्द गर्नुपर्ने बोहराले बताए।

जिल्लामा १३ क्रसर उद्योग दर्ता गरिएका छन्। चार वटा उद्योगलाई मापदण्ड पूरा नगरेको भन्दै केहि महिना अघि स्थानीय प्रशासनले बन्द गरेको थियो। सञ्चालनमा रहेका अन्य उद्योगहरुको कागजात जाँच तथा उद्योगको विस्तृत अध्ययन भइरहेको कञ्चनपुरका प्रमुख जिल्ला अधिकारी गोपाल प्रसाद अर्यालले बताएका छन्। मापदण्ड पूरा पालन नगरेका उद्योगलाई अनुगमन समितिको बैठकको निर्णयअनुसार कारवाहि हुने उनले बताए।

संघीय मामिला तथा सामान्य प्रशासन मन्त्रालयले जारी गरेको मापदण्ड २०७७ अनुसार बस्ती, मुख्य सडक, राजमार्ग, विद्यालय, स्वास्थ्य संस्था, ठूला नदी, पुल, धार्मिकस्थल, सांस्कृतिक, पुरातात्विक महत्वका स्थान र वन क्षेत्रको पाँच सय मिटरदेखि दुई किलोमिटरभित्र नदीजन्य पदार्थ उत्खनन र सङ्कलन गर्ने गराउने लगायतका कुनै कार्य गर्न नपाइने उल्लेख गरिएको छ।

अनुगमनमा जिल्ला समन्वय समितिका प्रमुख, प्रमुख जिल्ला अधिकारी, आन्तरिक राजस्वका प्रमुख, डिभिजन वन कार्यालयका प्रमुख तथा सुरक्षा निकायका प्रमुख र स्थानिय तहका प्रमुखलगायतको सहभागीता रहेको थियो। दिनेश खबरबाट