धनगढीः वरिपरि जङ्गलको रमणीय दृश्य छ। बीचमा सुन्दर प्राकृतिक ताल। ताल परिसरमा बालबालिकादेखि वयस्क रमाउँदै छन्। कैलालीको कोइलही ताल क्षेत्रमा आज देखिएको दृश्य हो, यो।

कैलारी गाउँपालिका–९ मा रहेको यो ताल आन्तरिक पर्यटकका लागि महत्वपूर्ण गन्तव्य बनेको छ। सार्वजनिक बिदाका बेलामात्रै नभइ अन्य दिन पनि यो तालमा घुमफिर गर्न र पिकनिक खानेका लागि गन्तव्य बन्दैगएको छ। आन्तरिक पर्यटकले कोइलही ताल खचाखच हुन थालेको छ।

‘बिदाको दिन अझै बढी मान्छे हुन्छन्’, ताल क्षेत्रमा फलफूलको व्यापार गर्दै आएका बनकन्द्री गाउँका बुधराम थारुले भने, ‘अरु दिन पनि घुम्न आउनेको सङ्ख्या कम छैन।’ दिनहुँ दुई तीन सय मान्छे घुमफिर गर्न र पिकनिक खानका लागि कोइलही ताल आउनेगरेको उनको भनाइ छ।

यो तालमा पर्यटकका मनोरञ्जनका लागि डुङ्गा सञ्चालन हुँदैआएको छ। ताल अवलोकन र घुमफिर गर्न आएकाहरु डुङ्गामा सयर गरेर आनन्द लिनेगरेका छन्। पिकनिक खानका लागि मात्रै नभइ शैक्षिक भ्रमणका लागि टाढा–टाढाको विद्यालयका विद्यार्थी, शिक्षक पनि कोइलही ताल पुग्ने गर्छन्। चाडपर्वपछि धेरैजसो मान्छे पिकनिक खानका लागि कोइलही ताल आउनेगरेका स्थानीयवासी बताउँछन्। ताल परिसरमा पिकनिक क्षेत्र बनाइएको छ। पिकनिक क्षेत्रमा हरेक दिन घुइँचो लाग्नेगरेको स्थानीय व्यापारी थारुले बताए।

यसैगरी, विभिन्न संघसंस्था, समूह र शैक्षिक संस्थाका कर्मचारीहरु संस्थागत छलफलसहित रमाइलो गर्नका लागि पनि कोइलही तालमा पुग्नेगरेका छन्। जोशीपुर गाउँपालिका –२ मुद्धि घर भइ युनाइटेड एकेडेमी स्कुल टीकापुरमा कार्यरत रञ्जना रावतले अफिसको ‘मिटिङ’ सहित पिकनिकका लागि पहिलो पटक कोइलही तालमा आएको बताइन। ‘एक दिन घुमघाम गरेर फर्कन सकिने भएकोले छोटो समयमा घुमघाम गर्न चाहनेहरुका लागि यो ठाउँ राम्रो लाग्यो’ सोही विद्यालयका शिक्षक ललिता कठरियाले बताए।

७२ हेक्टर क्षेत्रफलमा फैलिएको यो ताललाई आर्थिक वर्ष २०७३–७४ मा थोरै व्यवस्थित गर्ने कार्य भएको थियो। राष्ट्रपति चुरे तराई मधेश संरक्षण विकास समितिको तालतलैया एवः सिमसार क्षेत्र संरक्षण तथा व्यवस्थापन कार्यक्रम अन्तर्गत ९७ लाख ७४ हजार रुपियाँ खर्चेर व्यवस्थापनको साथै केही संरचना बनाउने कार्य भएपछि आन्तरिक पर्यटकको चहलपहल बढेको छ। दशैं, तिहार सकिएपछि हरेक वर्ष हिउँद यामभरी पर्यटकको घुइँचो लाग्ने गर्छ।

अत्तरियास्थित होलिल्याण्ड स्कुलका शिक्षक सुरेन्द्र चन्दले घुमफिरका लागि ताल क्षेत्र निकै राम्रो रहेको बताए। ‘यो ठाउँ राम्रो छ’, उनले भने, ‘यहाँ थुप्रै मान्छे घुमफिर गर्न आउने गर्दछन्।’ सो विद्यालयका विद्यार्थीसमेत शैक्षिक भ्रमणको लागि कोइलही ताल पुगेका थिए।

आन्तरिक पर्यटकको चहलपहल बढेपछि कोइलही ताल क्षेत्रमा व्यापार व्यवसाय पनि फष्टाएको छ। स्थानीय व्यवसायीले पिकनिक क्षेत्रमा नास्ता, मिठाइ, फलफूल, पान लगायतको व्यापार गर्दैआएका छन्। दिनभरिमा दश बाह्र हजार रुपियाँको बिक्री हुनेगरेको मिठाइ व्यापारी रामु चौधरीले बताउनुभयो । ‘भीडभाड बढी भएको दिन व्यापार राम्रो हुन्छ’, उनले भने। गोरखापत्र