काठमाडौँ २६ भदौ । नेपालले साफ च्याम्पियनसिपमा इतिहास रच्ने राष्ट्रिय फुटबल टोलीका प्रशिक्षक बालगोपाल महर्जनले बताएका छन्। नेपालले प्रतियोगिताको सेमिफाइनलमा बुधबार माल्दिभ्सविरुद्ध प्रतिस्पर्धा गर्दैछ।

खेल नेपाली समयअनुसार दिउँसो पौने ४ बजे ढाकास्थित बंगबन्धु रंगशालामा सुरु हुनेछ। नेपाल २५ वर्षे साफ च्याम्पियनसिपको इतिहासमा अहिलेसम्म सेमिफाइनलभन्दा माथि पुग्न सकेको छैन।

प्रशिक्षक महर्जनले साफ च्याम्पियनसिपको पूर्वसन्ध्यामा बंगलादेशमा आयोजना भएको पत्रकार सम्मेलनमा नेपालले माल्दिभ्सलाई पराजित गर्दै फाइनलमा पुगेर इतिहास रच्ने दाबी गरेका हुन्। उनले भने, ‘नेपाल साफ च्याम्पियनसिपको ग्रुप स्टेजको खेलमा उत्कृष्ट प्रदर्शन गर्दै समूह बिजेता बनेको टोली हो। पाकिस्तानसँग २–१ ले पराजित भएपनि भुटानलाई ४–० र आयोजकलाई २–० ले पराजित गर्नु नेपालको लागि महत्वपूर्ण कुरा हो। नेपालले प्रतिस्पर्धात्मक खेलिरहेको छ। त्यसैले म नेपाल फाइनलमा पुग्छ भन्नेमा विश्वस्त छु। नेपालले इतिहास रच्नेछ।’

यसैगरी पत्रकार सम्मेलनमा नेपाली राष्ट्रिय फुटबल टोलीका कप्तान बिराज महर्जनले नेपालले माल्दिभ्सलाई पराजित गर्नेमा आफू् विश्वस्त भएको बताएका छन्। उनले भने, ‘नेपालले माल्दिभ्सलाई जित्छ भन्नेमा विश्वस्त छु। तर धेरै विश्वस्त चाहिँ छैन्। बुधबार हामी जितकालागि मैदान उत्रनेछौं।’

पाँचौ पटक सेमिफाइनल खेल्न लागेको नेपाली टोलीका लागि माल्दिभ्स केही कमजोर प्रतिद्वन्द्वी देखिएको छ। यसअघि सन् १९९५, सन् १९९९, सन् २०११ र २०१३ मा नेपाल सेमिफाइनलसम्म पुगेको थियो। समूह चरणमा दुई खेल खेलेको माल्दिभ्स एकमा पराजित र एकमा बराबरी गर्दै सेमिफाइनल पुगेको हो। पहिलो सेमिफाइनलमा प्रतिस्पर्धाका लागि मैदान उत्रदै गर्दा दुवै टोलीको लक्ष्य फाइनल पुग्नु रहनेछ। तर नेपालले साफ च्याम्पियनसिपमा माल्दिभ्सलाई अहिलेसम्म पराजित भने गर्न सकेको छैन।

साफ च्याम्पियनसिपमा नेपाल र माल्दिभ्स अहिलेसम्म छ पटक खेलेका छन्। जसमा चार खेल माल्दिभ्सले जितेको छ भने दुई खेल बराबरीमा सकिएको थियो। नेपालले साफमा माल्दिभ्सविरुद्ध सात गोल गर्दा १४ गोल खाएको छ।

नेपालले माल्दिभ्ससँग खेलेको पछिल्लो खेल सन् २०१६ को बङ्गबन्धु गोल्डकप हो। उक्त खेलमा नेपालले माल्दिभ्सलाई ४–१ ले हराएको थियो। नेपाल र माल्दिभ्सबीचको विजेताले भारत र पाकिस्तानबीचको विजेतासँग फाइनलमा प्रतिस्पर्धा गर्नेछ। बुधबारनै भारत र पाकिस्तानबीच दोस्रो सेमिफाइनल हुनेछ।