काठमाडौं, १६ फागुन। गृह जिल्ला कास्कीमा अन्त्येष्ठि गर्ने निधो भइसकेको छ, बुधबार हेलिकोप्टर दुर्घटनामा निधन भएका संस्कृति, नागरिक उडड्यन मन्त्री रवीन्द्र अधिकारीको ।

उनीसहित अन्य ७ जना सवार भएको हेलिकोप्टर हराएको खबर आउनासाथ सामाजिक सञ्जालमा धेरैले लेखे– मानवीय क्षति नहोस्, दैवसँग प्रार्थना गर्छु । कतिपयले सुनिएको खबर नै गलत होस् भनेर पनि लेखे ।

तिनै रवीन्द्र अधिकारी जसलाई जनताले कहिले पनि हराएनन् । तर, प्रायः सवैको अपेक्षा विपरित दैवले उनलाई जिताएनन् । अन्ततः निधनको खबर पुष्टि भएर आयो ।

विहीबार राजधानीको टुँडीखेलमा उनलाई श्रद्धाञ्जलीको कार्यक्रम राखिएको छ । पछिल्लो पटक वाइडबडी काण्डमा उनलाई विवादमा तानिँदै गर्दा उनले सफाईका अनेक तर्क अघि सारेकै थिए ।

राजनीति गर्दा उनले उठाएका मुद्दा कहिल्यै पनि पराजित भएका थिएनन् । विद्यार्थी राजनीतिमा अतुलनिय उदय गरेका उनकै कार्यकालमा विद्यार्थीका लागि सार्वजनिक सवारी साधनमा भाडाको छुट मिल्यो । धेरैले यहि प्रसङ्गलाई उनलाई श्रद्धाञ्जली दिने क्रममा लेखेका पनि छन् ।

हसिला चेहरामा देखिने उनी यसअघि संविधानसभाको विकास समितिको सभापति थिए । जसले विकासका काममा भएका ढिलासुस्तीको चुस्तताका विषयमा निक्कै प्रभावी काम गरेको थियो । र, उनलाई संघीय संसदको चुनावको जीतले मन्त्री हुने अवसर जुराएको थियो ।

उनी पहिलो, दोस्रो संविधानसभा र संघीय चुनाव गरी तीन पटक उम्मेदवार भए, तीनै पटक जीत हासिल गरे । पहिलो हुँदै तेस्रोसम्म आइपुग्दा उनले जनमतको आकार पनि फराकिलो बनाइसकेको विवरणहरूले पुष्टि गर्छ ।

पहिलो संविधानसभाको निर्वाचनमा कास्की–३ बाट उनी १३ हजार ३ सय ८६ मतले विजयी भएका थिए । ०७० सालमा सोही क्षेत्रमा फेरि मतको ग्राफ बढ्यो । र, उनले १५ हजार ४ सय ५६ मत ल्याएर बिजयीको माला पहिरिए । सोही बेला उनी विकास समिति सभापति भएका थिए ।

संघीय चुनावमा भने साविकको निर्वाचन क्षेत्र नम्बर २ बन्यो, उनलाई जनताले जिताए । जित्ने ग्राफ अझ चढ्यो । उनले २७ हजार २ सय ७ मत प्राप्त गरेका थिए ।

उमेरले ५० को आसपास दौडिरहेका उनको राजनीतिक छवि र उचाई तिव्रताका साथ बढिरहेको र जनताले जिताइरहँदा भने पाथीभरा मन्दिरको दर्शनका निम्ति जाँदा दैवले उनलाई हराइदिए । जीवनदेखि पराजित गरिदिए र सम्झनामा मात्र सीमित पारिदिए ।
दैनिक नेपालबाट साभार