भवानी भट्ट, टोकियो १३ असोज । 

दार्चुलाको लेकम गाउँपालिकामा पहिलोपटक ‘लेकम गाउँपालिका दशैं कप–२०८३’ पुरुष भलिबल प्रतियोगिता आयोजना हुने भएको छ। जापानमा व्यवसायसँगै सामाजिक सेवामा सक्रिय नेपाली व्यवसायी तथा समाजसेवी क्रियाशील उद्यमी एवम् सामाजिक अभियन्ता दिलेन्द्र प्रसाद जोशीको पहलमा प्रतियोगिता आयोजना गर्न लागिएको हो।

बडादशैंको अवसरमा गाउँ फर्किने तथा स्थानीय युवालाई खेलकुदमार्फत एकै ठाउँमा जोड्ने, स्थानीय खेलप्रतिभाको पहिचान गर्ने र विभिन्न वडाबीच आपसी सद्भाव तथा भाइचारा बढाउने उद्देश्यले प्रतियोगिता आयोजना गर्न लागिएको आयोजकले जनाएको छ।

प्रतियोगिता २०८३ असोज २९ गते लेकम–स्थित श्री हुनैनाथ माध्यमिक विद्यालय, रातामाटामा सञ्चालन हुनेछ। प्रतियोगितामा सहभागी हुन चाहने टोलीले असोज २८ गतेभित्र दर्ता गरिसक्नुपर्नेछ। दर्ता शुल्क ३ हजार रुपैयाँ तोकिएको छ।

प्रतियोगिताको विजेता टोलीले ३३ हजार ३३३ रुपैयाँ, उपविजेताले २२ हजार २२२ रुपैयाँ र तृतीय हुने टोलीले ११ हजार १११ रुपैयाँ नगद पुरस्कार प्राप्त गर्नेछन्। विजेता तथा उत्कृष्ट खेलाडीलाई ट्रफी, पदक र प्रमाणपत्रसमेत प्रदान गरिनेछ।

खेलकुदसँगै सामाजिक अभियान

दशैं कपसँगै जोशीको पहलमा ‘युथ स्पोर्ट्स एन्ड सोसल क्लब’ स्थापना गर्ने तयारीसमेत गरिएको छ। क्लबमार्फत खेलकुदका अतिरिक्त शिक्षा, स्वास्थ्य, सामाजिक सेवा, कला–संस्कृति तथा युवा प्रतिभा पहिचानका क्षेत्रमा दीर्घकालीन रूपमा काम गर्ने योजना रहेको जोशीले बताएका छन्।

करिब १३ वर्षदेखि जापानमा बस्दै आएका जोशी रेस्टुरेन्ट, ट्राभल तथा आयात–व्यापार क्षेत्रमा व्यवसाय गर्दै आएका छन्। जापानमा व्यवसाय विस्तारसँगै उनले नेपालमा शिक्षा, कृषि तथा सामाजिक क्षेत्रमा समेत लगानी र सहयोग गर्दै आएका छन्। आफूले अध्ययन गरेको विद्यालय तथा लेकम क्षेत्रका विभिन्न शैक्षिक र सामाजिक गतिविधिमा पनि उनको सहयोग रहँदै आएको छ।

विदेशमा रहे पनि जन्मभूमि र स्थानीय युवासँग निरन्तर जोडिनुपर्ने धारणा राख्दै जोशीले भने, विदेशमा बसेर व्यवसाय गर्नु वा सफलता हासिल गर्नु मात्रै पर्याप्त होइन। आफू जन्मिएको ठाउँ, आफूले पढेको विद्यालय र आफू हुर्किएको समाजका लागि पनि केही गर्नुपर्छ भन्ने सोचले यो अभियान सुरु गरेका हौँ।

उनका अनुसार दशैंका बेला गाउँ फर्किने युवालाई खेलकुदमार्फत जोड्दै आगामी दिनमा लेकममा विभिन्न खेलकुद तथा सामाजिक गतिविधिलाई निरन्तरता दिइनेछ।

‘प्रथम लेकम गाउँपालिका दशैं कप–२०८३’ जोशीको जन्मभूमिसँग जोडिने अभियानको पहिलो ठूलो कार्यक्रमका रूपमा अघि बढाइएको हो। नकआउट प्रणालीमा सञ्चालन हुने प्रतियोगितामा एउटै वडाका खेलाडीले मात्र सम्बन्धित वडाको प्रतिनिधित्व गर्दै सहभागी हुन पाउने व्यवस्था गरिएको छ।

प्रतियोगितालाई भव्य रूपमा सफल पार्न आयोजक समितिले लेकम गाउँपालिकाका सम्पूर्ण वडा, स्थानीय खेलप्रेमी, युवा, अभिभावक तथा संघ-संस्थाहरूलाई उपस्थितिका लागि हार्दिक आह्वान गरेको छ।