ढल्केवर १२ फागुन । आसन्न निर्वाचनलाई लक्षित गर्दै मधेस प्रदेशमा बदर मतको संख्या घटाउने उद्देश्यका साथ मतदाता शिक्षा कार्यक्रम सञ्चालन गरिएको छ। सूचनाको हकका लागि राष्ट्रिय महासंघ (National Federation for Right to Information) द्वारा आयोजना गरिएको हो ।

गत निर्वाचनमा सबै भन्दा बढी मत बदर भएका मध्ये महोत्तरी, सिराह र रौतहट जिल्लाका २७ जना युवि युवतीहरुको सहभागितामा मतदाता शिक्षा तालिम सम्पन्न भएको छ ।
ढल्केवरको कोमल होटेलमा संचालन भएको एक दिवशीय मतदाता शिक्षा तालिममा तिनै जिल्लाका दलित, महिला, आदीवासी जनजाती समुदायका युवालाई तालिम आआफ्नो समुदायमा मतदान गर्न सिकाउन तालिम दिईएको हो।

सूचनाको हकका लागि राष्ट्रिय महासंघव्दारा आयोजित तालिममा प्राध्यापक चिरन्जिवी खनाल, महासंघका अध्यक्ष उमीद बागचन्द र किरण पौडेलले सहजीकरण गरेका थिए ।

तालिममा सहभागीहरूलाई सही मतदान प्रक्रिया, मतपत्र चिन्ह लगाउने तरिका, गोप्य मतदानको महत्व, मत बदर हुने कारणहरू तथा त्यस्ता त्रुटि न्यूनीकरण गर्ने उपायबारे व्यवहारिक प्रशिक्षण प्रदान गरिएको महासंघका केन्द्रीय अध्यक्ष उमिद बागचन्दले जानकारी दिए। उनका अनुसार मतदातामा देखिने सामान्य त्रुटि, जस्तै एकभन्दा बढी स्थानमा छाप लगाउने, संकेतभन्दा बाहिर छाप पर्ने, वा मतपत्र सही तरिकाले नबुझ्ने जस्ता कारणले बदर मत बढ्ने भएकाले यसलाई न्यूनीकरण गर्न मतदाता शिक्षा अपरिहार्य रहेको बताए।

कार्यक्रममा प्रा. चिरञ्जिवी खनाल र किरण पौडेलले प्रशिक्षण दिएका थिए। उनीहरूले निर्वाचन प्रणाली, मतदाताको अधिकार तथा कर्तव्य, लोकतान्त्रिक प्रक्रियामा नागरिकको भूमिकालगायत विषयमा सहभागीहरूलाई अन्तरक्रियात्मक ढंगले प्रशिक्षण दिएका थिए। साथै, गलत सूचना (मिसइन्फर्मेशन), मत खरिद–बिक्री, र निर्वाचन आचारसंहितासम्बन्धी सचेतना पनि प्रदान गरिएको थियो।

महासंघका मधेस प्रदेश अध्यक्ष अजय शाहका अनुसार मधेस प्रदेशका महोत्तरी, सिरहा र रौतहट जिल्लाबाट २५ जना सहजकर्ता छनौट गरी तालिम प्रदान गरिएको हो। ती सहजकर्ताहरूलाई आ–आफ्नो जिल्लामा समुदायस्तरमा मतदाता शिक्षा कार्यक्रम सञ्चालन गर्ने जिम्मेवारी दिइएको छ।

तालिमपछि सहभागीहरूले मतदाताको अधिकार र कर्तव्य स्पष्ट रूपमा बुझ्ने, मतदान प्रक्रियाबारे अन्य नागरिकलाई जानकारी दिन सक्ने, समुदायमा सचेतनामूलक कार्यक्रम सञ्चालन गर्ने योजना बनाउन सक्ने तथा गलत सूचना र अनैतिक गतिविधिविरुद्ध जनचेतना फैलाउन सक्षम हुने अपेक्षा गरिएको छ।

महासंघले लोकतान्त्रिक प्रक्रियालाई सुदृढ बनाउन र स्वच्छ, निष्पक्ष तथा प्रभावकारी निर्वाचन सुनिश्चित गर्न यस्ता कार्यक्रमलाई निरन्तरता दिने जनाएको छ।

१३ गते देखि यी तिन जिल्लामा २४ जनाले टोल टोलमा गएर प्रत्येकले दैनिक ५० जनालाई  सिकाउने छन भने ३ जनाले उनिहरुलाई सघाउने छन ।यसरी उनीहरुले ६ हजार जनालाई मतदाव गर्न सिकाउने छन ।