काठमाडौं १५ पुष । नेपाली कांग्रेसका महामन्त्री गगनकुमार थापासहित दर्जनौं नेताहरु आउँदो फागुन २१ गते हुने संघीय संसदको प्रतिनिधिसभा निर्वाचनमा भाग लिन नपाउने भएका छन्।

महामन्त्री थापासहितका नेताहरुले निर्वाचन (कसुर तथा सजाय) ऐन २०७३को दफा ३१ को उपदाफा (४) बमोजिम निर्वाचन सम्पन्न भएको ३५ दिन भित्र निर्वाचन खर्च विवरण नबुझाएका कारण उम्मेदवार हुन नपाउने भएका हुन्।

आयोगका अनुसार थापाले २०७९ मंसिर ४ गते भएको प्रतिनिधिसभा सदस्य निर्वाचनमा काठमाडौं क्षेत्र नं. ४ मा प्रत्यक्ष तर्फको निर्वाचनमा उम्मेदवार हुँदा निर्वाचन खर्च विवरण बुझाएका थिएनन्।

थापासहित १०३७ जनालाई आयोगले २०८० वैशाख ४ गते निर्वाचन कसुर गरेको भन्दै १५ हजार रुपैयाँ जरिवाना सजाय गर्ने निर्णय गरेको थियो।

थापासहित प्रतिनिधिसभाको प्रत्यक्षतर्फ उम्मेदवार भएर पनि १५ हजार रुपैयाँ जरिवाना समेत नतिर्नेलाई २०८२ साल साउन १ गते बसेको आयोगको बैठकले आगामी कुनै पनि तहको निर्वाचनमा उम्मेदवार हुन नपाउने निर्णय गरेको थियो।

आयोगअनुसार यसरी २०७९ को प्रतिनिधिसभाको निर्वाचनमा उम्मेदवार भएर निर्वाचन खर्च विवरण नपठाउने र तोकेको जरिवानासमेत नतिरेका कारण उनी निर्वाचनमा भाग लिन नपाउने भएका हुन्।

यसरी जरिवाना नतिर्ने प्रतिनिधिसभाको पत्यक्षतर्फका उम्मेदवारहरुमा नेकपा एमालेका अध्यक्ष केपी ओलीका विश्वास पात्र तथा थापाका प्रत्यासी भएका नेता राजन भट्टराई, नेकपा मालेकी लीलामाया पौडेलसहित छन्।

आयोगले निर्वाचन सम्पन्न भएको ६ महिना भित्र निर्वाचन खर्च विवरण नदिने लोकतान्त्रिक समाजबादी पार्टीका अध्यक्ष महन्थ ठाकुर, नेता शरतसिंह भण्डारी, जसपा नेपालका अध्यक्ष उपेन्द्र यादब, प्रदीप यादव, जनता समाजबादी पार्टीका नेता बीरेन्द्रकुमार महतो, हाम्रो नेपाल पार्टीका अर्चन शम्शरे जबरालाई १५ हजार रुपैयाँ जरिवाना तिराएको थियो।

त्यस्तै नेकपा एमालेका नेताहरु हरिप्रसाद उप्रेति, लक्ष्मी कोइरी महतो, भूमिप्रसाद त्रिपाठीलाई पनि १५ हजार रुपैयाँ जरिवाना आयोगले गरेको थियो।
नेकपा माओबादीकी ओनसरी घर्ती मगर, पम्फा भुषाल, गिरिराजमणि पोखरेल, विश्वनाथ साह, राष्ट्रिय प्रजातन्त्र पार्टीका सहअध्यक्ष रबिन्द्र मिश्र, प्रवक्ता ज्ञानेन्द्र शाही, गोपाल दाहाल, राष्ट्रिय स्वतन्त्र पार्टीका महामन्त्री कविन्द्र बुर्लाकोटी, जनता प्रगतिशिल पार्टीका अध्यक्ष हृदयेस त्रिपाठीलाई समेत आयोगले १५ हजार रुपैयाँ जरिवाना गरेको थियो।

त्यस्तै, कांग्रेस थापासहित नेता विजयकुमार गच्छदार, महालक्ष्मी उपाध्याय ‘डिना’, अजयकुमार चौरसिया, शंकर भण्डारी, मिसेनदास प्रधानलाई समेत आयोगले निर्वाचनसम्वन्धी कसुरमा जरिवाना तिराएको थियो।

-Agnirekha news बाट

gagan listed ecnepal.pdf :To download file click here