काठमाडौं– तेस्रो संस्करणको धनगढी प्रिमियर लिग ९डिपिएल०मा ६ खेलाडी सर्वाधिक महँगा भएका छन्। शनिबार भएको अक्सनमा ६ खेलाडी अधिकत मूल्य २ लाख ५० हजार रुपैयाँमा बिक्रि भएका हुन्।

जसमा रुपेन्देही च्यालेन्जर्सले ३ जना खेलाडीलाई महँगो मूल्यमा आबद्ध गरेको छ। रुपन्देहीमा तीव्र गतिका बलर ललित भण्डारी, ब्याट्सम्यानद्वय विनोद भण्डारी र भीम सार्की २ लाख ५० हजार रुपैयाँमा आवद्ध भएका छन्। यस्तै धनगढी स्टार्समा अलराउन्डर पवन सराफ सर्वाधिक २ लाख ५० हजार रुपैयाँमा आवद्ध हुँदै महँगो खेलाडी बनेका छन्। यस्तै महेन्द्रनगर युनाइटेडले अलराउन्डर आरिफ शेखलाई २ लाख ५० हजार रुपैयाँमा आवद्ध गरेको छ। काठमाडौं गोल्डेन्समा आबद्ध ललितनारायण राजवंशी पनि २ लाख ५० हजारमा आबद्ध हुँदै महँगा खेलाडी बनेका छन्।

न्यूनतम ३० हजारदेखि अधिकतम २ लाख ५० हजार मूल्य राखेर २ सय ५ खेलाडीले अक्सनमा आवद्ध हुन आवेदन दिएका थिए। एक लाख भन्दा बढी मूल्यमा पनि झन्डे डेढ दर्जन खेलाडी बिक्रि भएका छन्।

जसमा काठमाडौंले विकेटकिपर ब्याट्सम्यान आसिफ शेखलाई १ लाख ८० हजार,सुसन भारी १ लाख र तीव्र गतिका बलर किशोर महतोलाई पनि १ लाखमा आबद्ध गरेको छ।

सिवाइसी अत्तरियाले स्पिनर भुवन कार्की २ लाख १० हजार र ब्याट्सम्यान सन्दीप जोरालाई २ लाख ३० हजारमा भित्राएको छ।

धनगढीले ब्याट्सम्यान सौरभ खनाललाई १ लाख ६० हजारमा, ओपनिङ ब्याट्सम्यान अमित श्रेष्ठ १ लाख ८० हजार र ब्याट्सम्यान सुनील धमला १ लाख ८० हजारमा आबद्ध गरेको छ।

काठमाडौंले बलरद्वय विक्रम भुषाल १ लाख ६० हजार र रासिद खान १ लाख ७० हजारमा किनेको छ। ब्याट्सम्यान अनिलकुमार साह १ लाख ७० हजारमा काठमाडौंमा भित्रिएका छन्।

महेन्द्रनगरमा अभिनास बोहोरा १ लाख ७० हजारमा, अमरसिंह रटेला १ लाख २० हजारमा सागर ढकाल १ लाखमा र रोहित पौडेल २ लाख ३० हजारमा बिक्रि भएका छन्।

रुपन्देहीले प्रदीप ऐरी २ लाख ४० हजार र सन्दीप सुनार १ लाख १० हजार आबद्ध गरेको छ।

रणनीतिक खेलाडी परिवर्तन
डिपिएलमा विराटनगर किंग्सको रणनीतिक खेलाडीमा करण केसी आबद्ध भएका छन्। गत सिजन राष्ट्रिय टिमका कप्तान पारस खड्का विराटनगरको रणनीतिक खेलाडी थिए। यस सिजन पारसले ब्यक्तिगत कारण देखाउदै डिपिएल नखेल्ने बताइसकेका छन्।

काठमाडौंमा ज्ञानेन्द्र मल्ल, अत्तरियामा दीपेन्द्रसिंह ऐरी र धनगढीमा सोमपाल कामीले रणनीतिक खेलाडीमा निरन्तरता पाएका छन्। यता महेन्द्रनगरमा शरद भेषवाकर रणनीतिक खेलाडी चुनिएका छन्। शरदले गत सिजन डिपिएल खेलेका थिएनन् भने महेन्द्रनगरको रणनीतिक खेलाडी विनोद भण्डारी थिए। रुपेन्देहीको रणनीतिक खेलाडीमा बसन्त रेग्मी छन्। गत सिनज शक्ति गौचन रुपेन्देहीको रणनीतिक खेलाडी थिए।

७२ खेलाडी बिक्री
शनिबार भएको अक्नसमार्फत ७२ खेलाडी बिक्रि भएका छन्। ११ खेलाडी खुला अक्सन र १–१ खेलाडी स्थानीयको रुपमा आबद्ध भएका छन्। यस्तै १–१ खेलाडी रणनीतिक खेलाडी भएसँगै प्रत्येक टिममा १३–१३ खेलाडी भएका छन्। अब हरेक टोलीले दुई विदेशी खेलाडी भित्राएपछि प्रत्येक टिममा १५ खेलाडी हुनेछन्।

टी–२० आधारमा सञ्चालन हुने प्रतियोगितामा १९ खेल हुनेछ। लिग चरणमा प्रत्येक टोलीले एक अर्को टोलीसँग प्रतिस्पर्धा गर्नेछ। प्रतियोगिताको शीर्ष चार टोली प्लेअफमा छनोट हुनेछ। प्लेअफमा पुगेको चार टोलीमध्ये अङ्कतालीकामा पहिलो र दोस्रो हुने टिमको विजेता फाइनल पुग्नेछ। त्यसमा पराजित हुने टोलीले तेस्रो र चौथो हुने टोलीबीच हुने खेलको विजेता सिधै फाइनल प्रवेश गर्छ भने पराजित हुने टोलीले तेस्रो र चौँथोबीचको विजेतासँग खेल्नेछ।

प्रतियोगिता आगामी माघ २६ देखि फागुन ११ गतेसम्म धनगढीमा आयोजना हुनेछ। प्रतियोगिताका सम्पूर्ण खेल धनगढीस्थित फाप्ला क्रिकेट मैदानमा हुनेछन्। प्रतियोगितामा छ टोलीले सहभागिता जनाउने छन् । सहभागी टोलीमा धनगढी स्टार्स, सिवाइसी अत्तरिया, रुपन्देही च्यालेन्जर्स, महेन्द्रनगर युनाइटेड, काठमाडौँ गोल्डेन र विराटनगर किंग्स रहेका छन्।
नेपाल लाइभबाट साभार