काठमाडौं २६ भाद्र । राष्ट्रपति रामचन्द्र पौडेलले देशको अहिलेको विषम परिस्थितिमा मुलुकलाई संवैधानिक दायारमा रहेर कसरी निकास दिन सकिन्छ भन्ने प्रयासमा आफू रहेको बताएका छन्।

जेनजीको आन्दोलनसँगै प्रधानमन्त्री केपी शर्मा ओलीले राजिनामा दिएपछि राष्ट्रपति र प्रधानमन्त्रीको कार्यालय तथा सर्वोच्च अदालतसमेत जलेर नष्ट भएको अवस्थामा शुक्रबार विज्ञप्ति जारी गर्दै राष्ट्रपति पौडेलले लोकतन्त्रको संरक्षण तथा शान्ति सुव्यवस्था कसरी कायम गर्न सकिन्छ भनेर आफूले विचार विर्मश एवम् हर प्रयासमा लागिरहेको बताएका हुन्।

आमनागरिकलाई सम्बोधन गर्दै जारी गरिएको विज्ञप्तिमा आन्दोलनकारी नागरिकका माग सम्बोधन गर्ने र छिटोभन्दा छिटो समस्याको निदानको खोजी भइरहेको कुरामा विश्वस्त हुन आग्रह गरेका छन्।

उनले संयमतापूर्वक मुलुकमा शान्ति सुव्यवस्था कायम गर्न सहयोगका लागि सबैसँग आग्रह गरेका छन्।