काठमाडौं १५ भाद्र । नेपाल पत्रकार महासंघ र सञ्चार तथा सूचना प्रविधि  मन्त्रालयका बिचमा ४ बुँदे सहमति भएको छ ।

आइतबार अपरान्ह  मन्त्रालय र महासङ्घका पदाधिकारीबिच ४ बुँदे सहमति भएको हो।

मन्त्रालयमा दुई पक्षबिचको छलफलपछि भएको सो सहमतिमा नयाँ अनलाइन सञ्चारमाध्यम दर्ताका लागि निवेदन प्राप्त भएमा सूचना तथा प्रसारण विभागले क्रमसङ्ख्या उल्लेख गरी सङ्कलन गर्ने जनाईएको छ।

साथै, अनलाइन सञ्चारमाध्यम सञ्चालन निर्देशिका २०७३ को दफा ६ मा दर्ता भएका अनलाइन सञ्चार माध्यमले प्रत्येक आर्थिक वर्ष समाप्त भएको मितिले ६ महिना (पौष महिना भित्र) नवीकरण गराउनु पर्ने व्यवस्था भएको सन्दर्भमा अर्को व्यवस्था नभएसम्म प्रेस काउन्सिल नेपाल र नेपाल विज्ञापन बोर्डले अनलाइन सञ्चारमाध्यम सूचीकरणको कार्य यथावत् राख्न मन्त्रालयबाट पत्राचार गर्नेलगायत ४ बुदेँ सहमति भएको हो ।

संचार तथा सूचना प्रविधिका सचिव राधिका अर्याल र नेपाल पत्रकार महासंघका अध्यक्ष निर्मला शर्मा, महासचिव रामप्रसाद दाहाल लगायतकाले सहमति पत्रमा हस्ताक्षर गरेका थिए । बरिष्ठ उपाध्यक्ष दिपक आचार्य, उपाध्यक्षव्दय उमीद बागचन्द, नीतु पण्डित तथा सचिवहरु र सदस्यहरुको समेत सहभागिता रहेको थियो ।