धनगढी २३ बैशाख। सुदूरपश्चिम प्रदेशका स्वतन्त्र प्रदेश सभा सदस्य डा. तारा प्रसाद जोशीले धनगढीमा सुरु गरेको एआई सम्बन्धी तीन दिने कार्यशाला सेमिनार सम्पन्न भएको छ ।
विकासको लागि कृत्रिम बुद्धिमत्ता भन्ने विषयमा केन्द्रित तीन दिने सेमिनार १८ गते देखि धनगढीमा सुरु गरिएको थियो । धनगढीका विभिन्न कलेजमा व्याचलर अफ इन्फोर्मेशन म्यानेजमेन्ट अध्ययन गरिरहेका विद्यार्थीहरुलाई एआईको प्रयोग केवल प्रविधिमा सीमित नरही शिक्षादेखि स्वास्थ्य, कृषि, सुरक्षा र प्रशासनसम्म फैलिएको र यस क्षेत्रमा ठूलो करिअर सम्भावना रहेकोले विद्यार्थीहरूलाई यसतर्फ आकर्षित गर्नको लागि सो कार्यशाला आयोजना गरिएको प्रदेश सभा सदस्य डा. ताराप्रसाद जोशीले बताउनुभयो ।
सुदूपश्चिम प्रदेशको बजेटको दिशा कार्यकर्ता रिझ्याउने , सार्वजनिक खपत मुखी भयो भनेर आलोचना गर्दै आएका डा तारा जोशीले अबको बजेटमा एआई एक्सिलेन्स सेन्टर लगायत प्रविधी र उत्पादनमुलक होस भनेर दवाव दिन प्रदेश सभामै सो कार्यक्रम गरेका हुन् । उक्त कार्यशालामा कृत्रिम बुद्धिमत्ता (एआई) को विकास, सामाजिक तथा प्राविधिक प्रयोग, र नीति निर्माणमा प्रयोगका सम्भावनाहरूका विषयमा विद्यार्थी र विज्ञहरूसँग अन्तरक्रिया भएको उहाको भनाई छ ।

कार्यक्रममा काठमाण्डौ युनिभरसिटी एआई डिपाटमेन प्रमुख यज्ञराज पाण्डे, एआई बिज्ञ सागर उप्रेति,सुदिप श्रेष्ठ,रोशन श्रेष्ठ,संजोग नेपाली,रामप्रसाद चौधरी र भेषराज जोशीले सहभागि बिद्यार्थीहरुलाई एआई सम्बन्धी प्रशिक्षण गर्नुभएको थियो ।
सेमिनारमा कैलाली बहुमुखी क्याम्पस, सुदूरपश्चिमाञ्चल क्याम्पस र नेशनल एकेडेमी अफ साइन्स एण्ड टेक्नोलोजीका बिआईएम सङ्कायमा अध्ययनरत ७० जना विद्यार्थीहरूको सहभागिता रहेको उक्त कार्यक्रम आज सम्पन्न भएको हो ।