काठमाडौं  १८ बैशाख । स्वदेशी मजदुरहरू अब एक पटक राष्ट्रिय मुक्ति क्रान्तिमार्फत श्रमिकहरुको श्रमको सम्मान र श्रमिकहरुको आत्मसम्मानका लागि समतामुलक राज्य निर्माण गर्न क्रान्ति आवश्यक भएको राष्ट्रिय मुक्ति पार्टीका अध्यक्ष राजेन्द्र महतोले जनाएका छन् ।

१३६औं अन्तराष्ट्रिय श्रमिक दिवसको अवसरमा विहीबार शुभकामना व्यक्त गर्दै अध्यक्ष महतोले विगतमा राष्ट्रिय मजदूरलाई झुठा आश्वासनमा फसाउने राज्यधारी सभ्रान्तहरूका विरुद्ध एकजुट भएर संघर्ष गर्नु पर्ने विन्दुमा आइ पुगेको जनाएका हुन् ।

पूर्वउपप्रधानमन्त्री समेत रहेका नेता महतोले श्रमिकहरुको श्रमको सम्मान गर्ने र श्रमिकहरूको आत्मसम्मान उच्च बनाउन न्यायपूर्ण र समतामूलक राज्य निर्माण सम्भव छ भएको बताएका हुन् ।

उनले बदलिदो परिवेशमा श्रमिकहरू विगतको जस्तो आर्थिक रुपमा नभएर सामाजिक, साँस्कृतिक र राजनैतिक रुपमा पनि शोषणको दुष्चक्रमा फसेको बताए।

‘आजको दिन हामी स्वदेशी राष्ट्रका श्रमिकहरूमा आफ्नो आत्मसम्मान उच्च बनाउने राष्ट्रिय मुक्ति क्रान्तिमार्फत दोहनकारी उपनिवेश अन्त्य गर्न पूनः एक पटक संघर्ष गर्न प्रण गर्दै बहुलराष्ट्रवादको साझा लक्ष्य प्राप्त गर्नका लागि अझ बढी प्रेरणा मिलोस’, अध्यक्ष महतोले विज्ञप्तिमा भनेका छन् ।

मे १ ले शिकागोको हेमार्केटमा सन् १८८६ मा श्रमिकहरूले आठ घण्टा काम, आठ घण्टा मनोरञ्जन र आठ घण्टा आरामको अधिकारका लागि गरेको बलिदानीपूर्ण संघर्षको सम्झना दिलाउने भन्दै महतोले यसै संघर्षको सम्मानमा सन् १८८९ मा पेरिसमा भएको अन्तर्राष्ट्रिय समाजवादी कंग्रेसले मे १ लाई अन्तर्राष्ट्रिय श्रमिक दिवसको रूपमा मनाउने निर्णय गरेको स्मरण गरे ।

‘विश्वभर झैं नेपालमा पनि श्रमिक आन्दोलनको इतिहास लामो र गौरवपूर्ण छ । राणा कालदेखी पञ्चायत विरुद्धको पहिलो जनआन्दोलन, माओवादी जनयुद्ध र दोश्रो जनआन्दोलन मार्फत लोकतान्त्रिक गणतन्त्रात्मक व्यवस्था स्थापनामा श्रमिक वर्गको सक्रिय भूमिका थियो’, महतोले भने ‘तर ती जनयुद्ध र आन्दोलनहरू पश्चात हरेक पटक श्रमिकहरू झुठा आश्वासनहरुमा ठगिएका छन । ’

श्रमिक वर्ग अधिकांश स्वदेशी राष्ट्रका जनताहरु हुने र उनीहरुलाई उपनिवेशकारी राज्य व्यवस्थाका सिमित राज्यधारी सभ्रान्तहरूले श्रमको शोषण गर्ने मात्र हैन, उनीहरूको प्राकृतिक स्रोतहरू दोहन गर्ने, उनीहरूलाई पैतृक भूमिबाट विस्थापन गर्ने, उनीहरुको परम्परागत आस्थाका केन्द्रहरूलाई भत्काउने, उनीहरुमाथि सांस्कृतिक औपनिवेशिकता थोपर्ने आदि काम भइ रहेको महतोले जनाए ।