ललिता साह , टोक्यो ९  साउन  । “संचार माध्यम मार्फत विश्वलाई जोडने प्रवासी नेपाली आवाज ” भन्ने नारा सहित संचार क्षेत्रमा नेपाली डायस्पोराको भूमिका र अवस्था माथि छलफल गर्न ग्लोवल मिडिया कन्फ्रेन्स २०२६ जापानको टोकियोमा शुरू भएको छ ।

उक्त सम्मेलनलाई सम्बोधन गर्दै नेपाल पत्रकार महासंघको अध्यक्ष निर्मला शर्माले दुई तिहाईको सरकारबाटै अभिव्यक्ति स्वतन्त्रता खतरामा रहेको बताइन । नेपाल सरकारलाई आरोप लगाउदै भनिन -हुँदा हुँदा मिडिया मार्ने , सरकारी संचार माध्यममै काम गर्ने पत्रकारलाई कामबाट निकाल्ने सरकारको अधिनायकवाद शैलीलाई परास्त गरी लोकतन्त्र ,संविधान, अभिव्यक्ति / प्रेस स्वतन्त्रता रक्षाको आन्दोलन सफल बनाउन डायस्पोराको सहयोग आवश्यक रहेको उनले भनिन -सोसल प्लेट फर्मले फैलाइएको भ्रामक सूचनाको बीच हाम्रा संचार माध्यमले नागरिकलाई सही सुचना दिएर भ्रम चिर्न सफल हुनुपर्छ । जापान सरकारले नेपाल र नेपालीमाथि गरेको सहयोग प्रशंसनीय रहेको अध्यक्ष शर्माले बताए ।

जापानको लागि नेपाली कार्यवाहक राजदूत हरिहर कान्त पौडेलका अनुसार , सरकार र पत्रकार प्रतिद्वन्द्वी नभई नङ र मासुको जस्तो सम्बन्ध छ । अन्य देशको तुलनामा नेपाली प्रेस र पत्रकारको भुमिका अग्रणी भूमिका निर्वाह गरेका छन् । यद्यपि पछिल्लो समय भ्रामक समाचार सम्प्रेषणले पत्रकारिता बदनाम हुदै गएको खतरा देखिएको औँल्याए ।

भौतिक रूपमा टाढा रहेका घरदेश र परदेशलाई जोड्ने प्रवासको पत्रकारिताको महत्व उच्च रहेको नेपाल पत्रकार महासंघको उपाध्यक्ष उम्मीद बागचन्दले बताए । जापान शाखाका संस्थापक अध्यक्ष तिलक मल्लले देश र विश्वभर छरिएर रहेका पत्रकारलाई जापानमा बोलाएर हामीले भोगेका , गरेका कार्यानुभव साट्ने महत्पूर्ण अवसरलाई उपलब्धी मुलक बनाउन हाम्रो प्रयत्न रहने बताएका छन् ।

गैर आवासीय नेपाली संघ जापानको वरिष्ठ उपाध्यक्ष रविन शेरचन भन्छन – हाम्रो सम्बन्ध समाचार आदान प्रदानमा मात्र सिमित छैन । ज्ञान , सीप, अर्थ लगायतको विषयमा ठूलो शक्ति भएकोले देश विकासमा यसको प्रयोग गर्न सक्नुपर्छ ।
यो सम्मेलनले विश्वका विभिन्नता देशमा छरिएर रहेका करिब एक करोड नेपालीको आवाज बोल्ने प्रवासमा रहेका पत्रकारको पिडा सम्बोधन गर्ने निर्णय गर्न प्रवासी नेपाली मञ्चका अध्यक्ष कुलचन्द्र खरेल स्माइल रेमिटका एसिया प्रवन्धक कर्मा सिंह , मोहन पौडेल , राजेन्द्र जम्मरकटेल, भूषण घिमिरे , एनआरएन जापानका अध्यक्ष सुभाष लामिछाने लगायतका वक्ताहरुले सुझाएका छन् ।

त्यस्तै दुनियाभर रहेका हामी नेपाली पत्रकारहरु विश्व बजारमा श्रम / कर्मसँगै महत्वपूर्ण समय निकालेर संचार क्षेत्रमा कलमले योगदान पुर्याई रहेका छौं । कुनै विभेद विना , पेशागत अधिकारको सुरक्षा गर्न महासंघ अभिभावकको अनुभूति प्रदान गरोस् । हामी डायस्पोरालाई भावनात्मक शक्तिको रुपमा उपयोग गरी प्रविधीमय डायस्पोरा निर्माणमा प्रतिवद्ध रहेको भन्दै नेपाल पत्रकार महासंघ अमेरिका शाखाको अध्यक्षहरु सुरज भण्डारी , युरोपका केजिन राई , कुवेत शाखाको राज मल्ल , दक्षिण कोरियाको संतोष खड्का , नेपाल अष्ट्रेलिया पत्रकार समाज (ऐन्जा )का कृष्ण तिवारी ,बेल्जियम शाखाका ओम शर्मा , युएई शाखाबाट मेघराज सापकोटाले कार्यक्रम सफलताको शुभकामना व्यक्त गरेका छन् ।
जापान शाखाका सचिव अर्जुन लामिछानेले संचालन गरेको सम्मेलनमा पत्रकारितामा प्रविधिको प्रभाव :जिम्मेवार पत्रकारिता ,देश र परदेश जोड्न :प्रवास पत्रकारिताको भुमिका ,प्रवासमा रहेको नेपाली समुदाय र मिडियाको सम्बन्ध , पत्रकार महासंघ र वैदेशिक शाखा बीचको सम्बन्ध र मुलुकमा लगानी भित्र्याउन डायस्पोरिक मिडियाको भूमिका विषयमा छलफल गरी निष्कर्ष निकाल्दै रोकियो घोषणापत्र जारी गरी ग्लोवल मिडिया कन्फ्रेन्स २०२६ सम्पन्न हुने नेपाल पत्रकार महासंघ जापान शाखाका अध्यक्ष रविन्द्र श्रेष्ठले जानकारी दिए ।